छिमेकी राष्ट्र भारतको मुम्बईमा भएको भारी वर्षाका कारण एउटा भवन ढल्दा ११ जनाको निधन भएको छ । लगातारको वर्षाका कारण भवन ढल्दा थप १५ जना घाइते भएका छन् । 

बुधबार दिनभर परेको अविरल वर्षापछि मुम्बईको मलाड पश्चिमको मालवणी क्षेत्रमा राति ११ बजे बिल्डिङ ढलेको भारतीय टेलिभिजन आजतकको अनलाइन संस्करणले लेखेको छ । 

भवन ढल्दा पुरिएका तथा घाइते भएका १५ जनाको उद्धार गरिएको समाचारमा जनाइएको छ । उद्धार गरिएका मध्ये गम्भीर घाइते रहेका ७ जनालाई अस्पताल लगिएको समाचारमा उल्लेख छ ।

वर्षाका कारण ढलेको घरमा तीन परिवार बस्दै आएका र उनीमध्ये केही बालबालिका पनि रहेका बताइएको छ । ढलेको घर नजिकैका अन्य तीन बिल्डिङ पनि खतरामा रहेको भन्दै त्यहाँ बस्ने परिवारलाई स्थानान्तरण गरिएको छ ।