बेलायतले गरिब राष्ट्रहरुका लागि १० करोडभन्दा बढी डोज कोरोना खोप सहयोग गर्ने भएको छ । बेलायती प्रधानमन्त्री बोरिस जोनसनले सहयोगको घोषणा गरेका हुन् । 

जी सेभेन समिटको पूर्वसन्ध्यामा बेलायतले सहयोगको घोषणा गरेको हो । अबको एक वर्षमा १० करोड डोज कोरोना खोप विभिन्न गरिब राष्ट्रहरुलाई सहयोग गर्ने बेलायतको तयारी छ । 

सहयोगको ५० लाख डोज आगामी सेप्टेम्बरसम्ममा सहयोग गरिसक्ने भन्दै बेलायती प्रधानमन्त्री जोनसनले यो वर्षको अन्त्यसम्ममा २ करोड ५० लाख डोज खोप वितरण गरिने बताएका बिबिसीले लेखेको छ । 

बेलायतले सहयोग गर्ने खोप ९० भन्दाबढी गरिब मुलुकले पाउने भएका छन् । एसियाली तथा अफ्रिकी क्षेत्रमा गरिब तथा न्यून आय भएका राष्ट्र प्राथमिकतामा पर्ने बताइएको छ । 

प्रधानमन्त्री जोनसनले बेलायतको खोप कार्यक्रमको सफलताका कारण आफूसँग रहेका अतिरिक्त संख्याका खोपहरू सहयोग दिनसक्ने अवस्थामा रहेको बताएका समाचारमा उल्लेख छ ।