गृहमन्त्री खगराज अधिकारीले शनिबार सशस्त्र प्रहरीको प्रधान कार्यालयको निरीक्षण गरेका छन् । उनले राष्ट्र र नागरिकको सेवा र सुरक्षामा सशस्त्र प्रहरी बल नेपालबाट भएगरेका काम कारबाहीबारे जानकारी पनि लिएका छन् । 

गृहमन्त्री अधिकारीले सशस्त्र प्रहरी राष्ट्रको अभिन्न सुरक्षा निकायको रुपमा अगाडि बढिरहेको बताए । कोभिड र भूकम्पको समयमा सशस्त्र प्रहरीले खेलेका भूमिकाको अधिकारीले प्रशंसा गरे । 

गृहमन्त्री अधिकारीले सशस्त्र प्रहरी बलका लागि आवश्यक साधन श्रोत, जनशक्ति  र वृत्ति विकासको कार्यमा सहकार्य गर्दै अगाडि बढ्ने भन्दै कार्यक्षेत्रमा पूर्ण व्यवसायिक र उच्च मनोबलका साथ क्रियाशील रहन निर्देशन दिए । 

गृहमन्त्री अधिकारीले सदियौँदेखि सार्वभौम सम्पन्न सगरमाथाको देश नेपालको सीमा सुरक्षामा कटिबद्ध भई सुरक्षाकर्मीले मातृभूमिको सुरक्षार्थ जिम्मेवारी निर्वाहमा प्रदर्शन गरेको क्षमताको पनि प्रशंसा गरे ।