युरो कप अन्तर्गत शुक्रबारको खेलमा स्विडेन विजयी भएको छ । उसले रूसको सेन्ट पिटर्सवर्गमा स्लोभाकियामाथि १-० को कठिन जित निकालेको हो ।

खेलको ७७ औँ मिनेटमा इमिल फोर्सवर्गले पेनाल्टीमार्फत् गरेको एक मात्र गोल स्विडेनलाई जित दिलाउन पर्याप्त बन्यो ।

स्लोभाकियाका गोलरक्षक मार्टिन डुब्राभकाले रोबिन क्वाइसनलाई लडाएपछि स्विेडनले पेनाल्डीको अवसर पाएको थियो ।

जितसँगै स्विडेन २ खेलबाट ४ अंक जोड्दै समूह ‘इ’ को शीर्ष स्थानमा उक्लिएको छ । पराजित स्लोभाकिया ३ अंकका साथ दोस्रो स्थानमा छ ।

स्विडेनले पहिलो खेलमा स्पेनसँग गोलरहित बराबरी खेल्दा स्लोभाकियाले पोल्यान्डमाथि २-१ को जित हात पारेको थियो ।