चीनको नेशनल हेल्थ कमिसन(एनएचसी) ले देशभरमा अहिलेसम्म एक अर्बभन्दा धेरै डोज भ्याक्सिन लगाइएकाे दाबी गरेको छ । यसरी भ्याक्सिन लगाउने चीन विश्वकै पहिलो देश हो । 

चीनपछि अमेरिका दोस्रो स्थानमा रहेको छ । अमेरिकामा ३१ करोडभन्दा धेरै डोज भ्याक्सिन लगाइसकिएको छ । यसै गरी छिमेकी मुलुक भारतमा पनि २७ करोडभन्दा धेरै डोज लगाइएको छ ।

एनएचसीका अनुसार मार्चको अन्तिममा पुरै देशमा भ्याक्सिनेसनको कामलाई तीव्र पारिएको थियो । शनिबारसम्म आउँदा एक अर्बभन्दा धेरै डोज भ्याक्सिन लगाइसकिएको छ । चीनमा लगाइएको डोज पुरै विश्वमा लगाइएको ढाइ अर्बको ४० प्रतिशत हो । यद्यपि एनएचसीले कति मानिसलाई भ्याक्सिन लगाइयो भन्ने कुरा खुलासा गरेको छैन ।

चीनमा २७ मार्चसम्म जम्मा १० लाख डोज खोप लगाइएको थियो । त्यो बेला चीन भ्याक्सिन लगाउने काममा अमेरिकाभन्दा दुई साता पछाडि थियो । एनएचसीको आंकडा अनुसार बितेको महिनामा ५० करोडभन्दा धेरै डोज लगाइएको थियो ।