विराटनगरस्थित बाल सुधार गृहबाट फरार भएका  चारजना बालकमध्ये एक जनालाई प्रहरीले पक्राउ गरेको छ ।

उनी जबरजस्ती करणी मुद्दाकाे सजाय भाेगिरहेका झापा घर भएका बाल कैदी हुन् । 

तीन तला माथिबाट हाम फालेर फरार भएकामध्ये एक जनालाई प्रहरीले विराटनगरको दुध फार्मदेखि शनिबार पक्राउ गरेको हो ।

भागेका अन्य तीनजना अझैसम्म फरार रहेको बालगृहका इन्चार्ज मिलन चौहानले बताए।

फरार हुने तीनमध्ये दुई जना जबरजस्ती करणी मुद्दाका कैद सजाय र एक जना हातहतियार खरखजाना मुद्दामा पुर्पक्षका लागि रहेका बाल बिज्याइँकर्ता थिए ।

संखुवासभा, उदयपुर र ओखलढुङ्गा घर भएका तीन जना फरार भएकाले खोजी जारी राखिएको मोरङ प्रहरीका निमित्त प्रमुख डिएसपी मन्जिल मुकारुङले जानकारी दिए ।

सुरक्षा स्रोतका अनुसार शनिबार बिहान २ः५५ बजेतिर एकैपटक चार जना सुधारगृहको तीन तला माथिबाट हामफालेर भागेका थिए ।

कमजोर भौतिक संरचनाको फाइदा उठाउँदै बाल सुधारगृहमा राखिएका दुई जना अगिल्लो वर्ष पनि फरार भएका थिए । फरार भएको पाँच दिनपछि झापादेखि पक्राउ परेका थिए ।