चलचित्र छायांकनका क्रममा अभिनेता विराज भट्ट घाइते भएका छन् । उनी भोजपुरी चलचित्र ‘आक्रोश’ छायांकनका क्रममा घाइते भएका हुन् । भट्ट घाइते भएपछि 
भारतको लखनउमा छायांकन भइरहेको चलचित्रको छायांकन रोकिएको छ ।

चलचित्रका लागि ‘एक्सन स्टन्ट’ गर्ने क्रममा भट्टको बायाँ खुट्टाको घुँडामा चोट लागेको छ । उनको खुट्टामा रगत जमेका कारण दुई साता आराम गर्न डाक्टरले सुझाएका छन्।

सन्दिप सिंहले निर्देशन गरिरहेको यो चलचित्रमा विराजसँगै प्राची सिंह, सन्जय पाण्डे, मनोज टाइगर लगायतका कलाकारको अभिनय छ । ४० प्रतिशत काम सकिएको चलचित्रको अभिनेता घाइते भएपछि छायांकन प्रभावित भएको छ ।

नेपाली चलचित्रमा काम गर्दागर्दै भोजपुरी चलचित्रमा लागेका यी अभिनेताले केही वर्ष अघि ‘जय परशुराम’ मार्फत नेपाली चलचित्रमा कमब्याक गरेका थिए  । चलचित्र हिट हुन नसकेपछि उनी पुनः भोजपुरी चलचित्रमै फर्किएका छन् ।