भोजपुरकी एक महिलालाई यौन शोषण गरेको आरोपमा नेपाल प्रहरीका एक असईलाइ झापाकाे प्रहरीले पक्राउ गरेको छ।
ट्राफिक प्रहरी पोस्ट झापा केर्खामा कार्यरत असई जितेन्द्रनारायण मण्डल विरुद्ध साउन ८ गते ती महिलाले किटानी जाहेरी दिएकी थिइन् ।
मण्डलले विगत ४ वर्षदेखि यौन शोषण र करणीसमेत गरेको किटानी जाहेरीका आधारमा प्रहरीले उनलाई पक्राउ गरेको हो । जितेन्द्रनारायण मण्डल विरुद्ध साउन ९ गते इलाका प्रहरी कार्यालय इटहरीमा जबरजस्ती करणीको जाहेरी दर्ता भएको सुनसरीका प्रहरी प्रमुख प्रहरी उपरिक्षक संजय सिंह थापाले बताए ।
जाहेरी दर्ता भएपछि अनुसन्धानको लागि मण्डललाई प्रहरीले सोमबार नियन्त्रणमा लिएको हो ।
२३ वर्षीया महिलाले आफूलाई अन्तिम पटक २०७७ चैत २८ गते इटहरी ६ स्थित अरुण होटेल एन्ड लजमा जबरजस्ती करणी गरेको आरोप लगाएकी छन्।
महिलाले दिएको उजुरीमा मण्डलले आफूलाई श्रीमती बनाउने भन्दै ४ वर्षदेखि यौन शोषण गरेको उल्लेख गरेकी छन् ।
जाहेरीमा मण्डल सरुवा भएसँगै भोजपुर, झापा, इटहरी, लौकहीमा डेरा गरी राखेको उल्लेख छ ।
महिलाले मण्डलकै दबाबमा दुई पटक गर्भपतन समेत गराएको बताइन् । गर्भपतन गराउन विभिन्न स्वास्थ्य केन्द्र गएको र परीक्षण गरेका कागजातसमेत आफूसँग रहेको महिलाको दाबी छ ।
मण्डल विरुद्ध जबरजस्ती करणीको जाहेरी परेकाले पक्राउ गरी थप अनुसन्धान गरिरहेकाे सुनसरीका प्रहरी प्रमुख थापाले जानकारी दिए ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।