सोमबार बसेको जिल्ला संकट व्यवस्थापन केन्द्र (डिसिसिएमसी)को बैठकले उपत्यकामा जारी निषेधाज्ञालाई थप कडाइसहित लम्ब्याउने निर्णय गरेको छ । 

बैठकले खुकुलो निषेधाज्ञासँगै कोरोना संक्रमण फैलिन थालेपछि थप कडाइका साथ निषेधाज्ञा लम्ब्याउने निर्णय गरेको हो । 

बैठकपछि काठमाडौंका प्रमुख जिल्ला अधिकारी कालिप्रसाद पराजुलीले कोरोना संक्रमण फैलिन थालेकाले निषेधाज्ञामा थप कडाइ गर्ने निर्णय भएको बताए । उनले भने, ‘भोलिदेखि नै अनुगमन थाल्दै सार्वजनिक स्थानमा भीडभाड गर्ने र मास्क नलगाउनेलाई जरिवाना तथा कानुनी कारबाही गरिनेछ ।’

बैठकले सहायक सिडिओको संयोजकत्वमा निषेधाज्ञा अनुगमन समिति गठन गरेको छ । समितिले मंगलबारदेखि नै काठमाडौं उपत्यकाको सार्वजनिक क्षेत्रको अनुगमन गर्नेछ ।

गत वैशाख १६ देखि जारी निषेधाज्ञा साउन २० गतेबाट सकिँदै छ । काठमाडौं, भक्तपुर र ललितपुरका प्रजिअसहित अब बस्ने कोभिड–१९ संकट व्यवस्थापन केन्द्र (सिसिएमसी)को बैठकले थप निर्णय गर्नेछ ।