कोरोना भाइरसको सन्त्रास सारा संसारभर व्याप्त छ । सन् २०१९ को डिसेम्बरमा चीनको वुहानबाट फैलिएको भाइरसका अनेकन भेरियन्ट देखा परेका छन् । भाइरसले रोकिने नाम लिएको छैन । 

जोन्स होप्किन्स युनिभर्सिटीका अनुसार हालसम्म विश्वभर ४३ लाख १ हजार ९० जना संक्रमितले ज्यान गुमाइसकेका छन् भने २० करोड ३२ लाख ७६ हजार २११ जनामा संक्रमण पुष्टि भइसकेको छ । 

भाइरसबाट सबैभन्दा धेरै प्रभावित मुलुक हो-अमेरिका । अमेरिकामा हालसम्म ६ लाख १७ हजार ३०७ जना संक्रमितले ज्यान गुमाइसकेका छन् । 

अमेरिकापछि ब्राजिलमा ज्यान गुमाउनेको संख्या धेरै छ । ब्राजिलमा हालसम्म ५ लाख ६३ हजार १५१ जनाले ज्यान गुमाइसकेका छन् । 

छिमेकी मुलुक भारत संक्रमितका हिसाबले विश्वको दोस्रो र मृत्युका हिसाबले तेस्रो स्थानमा छ । भारतमा हालसम्म ४ लाख २८ हजार ३०९ जना संक्रमितले ज्यान गुमाइसकेका छन् ।

यसैगरी मेक्सिकोमा २ लाख ४४ हजार ४२०, पेरुमा १ लाख ९६ हजार ९५०, रुसमा १ लाख ६२ हजार ८६०, बेलायतमा १ लाख ३० हजार ६६७, इटालीमा १ लाख २८ हजार २४२ र कोलम्बियामा १ लाख २२ हजार ६०१ जना संक्रमितले ज्यान गुमाइसकेका छन् ।

विश्वभर हालसम्म काेराेनाविरुद्ध चार अर्ब ४४ करोड ५४ लाख ४ हजार ५८७ डोज भ्याक्सिन लगाइसकिएको छ ।