पूर्वप्रधानमन्त्री तथा जनता समाजवादी पार्टीका संघीय परिषद अध्यक्ष डा. बाबुराम भट्टराईले अफगानिस्तानमा १४ हजार नेपाली सुरक्षा संकटमा रहेको भन्दै सरकारको ध्यानाकर्षण गराएका छन् । 

डा. भट्टराईले सामाजिक सञ्जालमार्फत अफगानिस्तानमा अमेरिकी सेना फर्किएपछि उत्पन्न परिस्थितिमा १४ हजारभन्दा बढी नेपाली संकटमा परेको बताएका छन् । 

उनी लेख्छन्, ‘अफगानिस्तानमा सुरक्षा संकटमा परेका १४ हजार बढी नेपाली कामदारलाई तुरुन्त स्वदेश फर्काउन सरकारले आलटाल/बहानाबाजी गर्नुभएन ।’ 

द्वन्द्वग्रस्त ठाउँमा आफ्ना नागरिक जानै नहुने बनाउनुपर्ने भट्टराईको भनाइ छ । उनले द्वन्द्वग्रस्त ठाउँमा आफ्ना नागरिकलाई पठाउन नहुने भन्दै उनीहरुको उद्धारमा सरकारले तुरुन्त कदम चाल्नुपर्ने बताएका हुन् । 

डा. भट्टराई लेख्छन्, ‘पहिलो त त्यस्ता द्वन्द्वग्रस्त ठाउँमा आफ्ना नागरिकलाई पठाउन र जाने वातावरण बनाउनै हुँदैनथ्यो । गइसकेपछि तिनको जीवन रक्षा गर्नु राज्यको दायित्व हो । किन्तु परन्तु नहोस् !’