नेकपा एमालेका युवा नेता योगेश भट्टराईले राजनीतिक दल विभाजनसम्बन्धी अध्यादेशप्रति विरोध जनाएका छन् । मंगलबार सरकारले अध्यादेश ल्याएपछि उनले कडा टिप्पणी गरेका हुन् ।  

उनले राजनीतिक दल विभाजनलाई सजिलो हुने गरी अध्यादेश जारी गर्नु मुलुकलाई घोर अस्थिरता र अराजकतातिर धकेलेर व्यवस्था र संविधानलाई धराशायी पार्ने सुनियोजित षड्यन्त्र भएको बताएका छन् । 

‘यो कदम हिजो पनि गलत थियो, आज पनि गलत छ र भोलि पनि गलत नै हुनेछ,’ उनले लेखेका छन्, विगतको फोहोरी राजनीतिक अभ्यासका दुस्परिणामबाट शिक्षा नलिनु र पुरानै गल्ती दोहोर्याउनु समकालीन नेतृत्वको घोर असफलता हो ।’ 

योगेशले यो अध्यादेश विनासर्त फिर्ता लिन प्रधानमन्त्री शेरबहादुर देउवालाई आग्रह गरेका छन् । केपी ओली र माधव नेपालले मुलुक र भावी पुस्ताको भविष्यलाई सम्झेर केही कदम पछि हटेर त्यागका साथ सम्झौता गर्नुपर्ने उनले सुझाब दिएका छन् । 

उनले आमाको दुःखद् निधनको शोकमा बसिरहेको बेलामा कुनै राजनीतिक टिप्पणी गर्ने इच्छा नहुँदा नहुँदै पनि संगीन परिस्थितिका कारण टिप्पणी गरेको बताएका छन् ।