मानवअधिकार तथा शान्ति समाजले अफगानिस्तानमा फसेका नेपाली नागरिकको सकुशल नेपाल फिर्तीका लागि प्रभावकारी कदम चाल्न सरकारलाई आग्रह गरेका छन् । 

मानवअधिकार तथा शान्ति समाजको प्रतिनिधिमण्डलले आज गृहमन्त्री बालकृष्ण खाँणसँग भेटी उक्त विषयमा सरकारको ध्यानाकर्षण गराएका हुन् । 

‘अफगानिस्तानमा तालिबानद्वारा सत्ता कब्जा पश्चात विकसित घटनाक्रमका कारण त्यहाँ फसेका सबै नेपाली नागरिकहरुको उद्धार र सकुशल नेपाल फिर्तीका लागि आवश्यकता अनुसार अन्य मुलुकहरूसँग समेत समन्वय र सहकार्य गरि प्रभावकारी कदम चाल्न शान्ति समाजले आग्रह गरेको हो,’ समाजद्वारा जारी विज्ञप्तिमा उल्लेख छ ।  

यसैगरी सोही भेटमा कोभिड–१९ को रोकथामका लागि सबै नागरिकलाई समयमै खोप उपलब्ध गराउन समेत समाजले सरकारको ध्यानाकर्षण गरेको थियो । 
भेटमा समाजले आणविक हतियार निषेध सन्धि लगायत विभिन्न अन्तर्राष्ट्रिय सन्धिहरु शिघ्र अनुमोदन गर्न पनि आग्रह गरेको थियो । 

प्रतिनिधिमण्डलमा समाजका सभापति गोविन्द खनाल, सल्लाहकार होमकान्त चौलागाई, महासचिव रामकृष्ण बराल, कोषाध्यक्ष जगन्नाथ पुडासैनी, केन्द्रीय सदस्य विष्णु भुषाल र काठमाण्डौ शाखा सभापति ईश्वर पुडासैनी संलग्न थिए ।