नेकपा (एकीकृत समाजवादी)का अध्यक्ष माधवकुमार नेपालले एमाले अध्यक्ष केपी शर्मा ओलीले आफ्नो वरिपरि प्रशंसा गरेर नाच्नेहरूलाई मात्र महत्व दिएको आरोप लगाएका छन् । आज (बिहीबार) बुद्धनगरस्थित क्वालिटी ब्याङ्क्वेटमा आयोजित पत्रकार सम्मेलनलाई सम्बोधन गर्दै नेता नेपालले सो कुरा बताएका हुन्। 

उनले भने, ‘कमरेड केपीले पार्टीमा भेदभाव गर्न थाल्नुभयो, कार्यकर्ताप्रति अन्याय गर्न थाल्नुभयो । देश र जनताप्रतिको समर्पण खोज्नुभएन । उहाँको वरिपरि प्रशंसा गरेर नाच्नेहरूको मात्र महत्व दिनुभयो ।’

ओलीको प्रशंसा गर्नेबाहेक सबैको अवमूल्यन गरेको उनले आरोप लगाए । उनले भने,‘अरू सबैको अवमूल्यन गर्नुभयो । यसले पार्टी शिथिल मात्र भएन, मृत्युप्राय हुने अवस्थामा पुग्यो । पार्टीमा उकुसमुकुस सुरु भयो । यो सबै परिस्थिति आएपछि हामीले नयाँ ढंगबाट जाने संकल्प गर्‍याैँ।’

‘जनताप्रतिको जिम्मेवारीबोधप्रति हामी गम्भीर भयौँ । आन्दोलनको रक्षा गर्न र जोगाउनका लागि, राष्ट्रियताको रक्षा गर्नका लागि अनि जनताका समस्याहरूलाई सम्बोधन गर्नका लागि नयाँ परिस्थिति सिर्जना गर्नुपर्ने आवश्यक्ता महसुस गर्‍याैँ’,नेता नेपालले थपे ।