स्थानीय तहमा मनपरीः  राज्यकोषबाट निजी आवासमा एसी जडान देखि मोबाइल र सारी वितरणसम्म
फरकधार / ११ भदौ, २०७८

जनकपुरधाम । धनुषाको विदेह नगरपालिकाका मेयर बेचन दासले आफ्नो घरमा प्रयोग गरिरहेका लाखौं मूल्यका सामानहरु राज्यकोषबाट खरिद गरेको पाइएको छ । 
राज्यले मेयर दासलाई आवास सुविधा उपलब्ध नगराए पनि उनले निजी प्रयोजनका सामानहरु आफ्नो घरका लागि राज्यकोषबाट किन्न लगाएका हुन् । 



उनले वासिङ मेसिन, बक्स पलङ, लो बेड, एसी, फ्रिजलगायतका आवासीय प्रयोजनका सामानहरु नगरपालिकाकै पैसाबाट खरिद गरी १५ लाख २८ हजार रुपैयाँ खर्च गरेको देखिएको छ ।  

स्थानीय तहका पदाधिकारी तथा सदस्यले पाउने सुविधाको सम्बन्धमा बनेको ऐन, २०७७ को दफा ३(१) मा पदाधिकारी तथा सदस्यले अनुसूची बमोजिमको रकममा नबढ्ने र दोहोरो नपर्ने गरी सुविधा पाउने व्यवस्था रहेपनि उनले ति सबै नियम कानूनलाई मिच्दै आफूखुशी घरायसी प्रयोजनका सामानहरु नगरपालिकाकै खर्चबाट किन्न लगाएका हुन् । 

मनोमानी रुपमा मोबाइल वितरण 



त्यस्तै, हंसपुर नगरपालिकाका मेयर रामज्ञान मण्डलले आर्थिक वर्ष २०७६/०७७ मा ९ लाख ९८ हजारमा ५० थान मोबाइल खरिद गरी जनप्रतिनिधिलाई वितरण गरेको पाइएको छ । उनले आर्थिक वर्ष २०७५/०७६ मा पनि ४ लाख ९८ हजार रुपैयाँमा ५७ थान मोबाइल खरिद गरी वितरण गरेका थिए । 

महालेखा परीक्षकको कार्यालयले सार्वजनिक गरेको ५८ औं प्रतिवेदनमा प्रत्येक वर्ष मोबाइल खरिद गरी जनप्रतिनिधिलाई वितरण गर्ने कार्य औचित्यपूर्ण नरहेको उल्लेख गरेको छ । 

अनुगमन भत्ताको नाममा लाखौं अनियमित खर्च 

प्रदेश २ कै महोत्तरी जिल्लास्थित पिपरा गाउँपालिकाले समेत अनुगमन भत्ताको नाममा पदाधिकारी तथा कर्मचारीलाई लाखौं रकम बाँडेको छ । 

गाउँपालिका अध्यक्ष बिक्रम चौधरीले भत्ताको नाममा पदाधिकारी तथा कर्मचारीलाई वडा तथा गाउँपालिकास्तरीय योजनाको अनुगमन गरेवापत २८ लाख ९५ हजार रुपैयाँ भत्ता भुक्तानी गरेका देखिएको छ । 

नगरपालिकाबाट साडी तथा कुर्ता वितरण 

रौतहटको इशनाथ नगरपालिकाले महिलाहरुका लागि साडी तथा कुर्ता वितरणमा १० लाख ९७ हजार रुपैयाँ खर्च गरेको छ । रौतहटकै फतुवा विजयपुर नगरपालिकाले साडी तथा ग्यास वितरणमा ८८ लाख ८६ हजार रुपैयाँ खर्च गरेको पाइएको छ ।

  • प्रकाशित मिति : भदौ ११, २०७८ शुक्रबार १८:५४:५२,   अन्तिम अपडेट : भदौ ११, २०७८ शुक्रबार १९:११:२१

फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, टिकटक, युट्युबमा पनि जोडिन सक्नुहुन्छ ।


यस विषयसँग सम्बन्धित समाचार

यो सामग्री सेयर गर्नुहोस्


यो पनि नछुटाउनुहोस्
मल्टिमिडिया