कैलालीका स्थानीय तहका जनप्रतिनिधिले नवगठित नेकपा (एकीकृत समाजवादी) पार्टी रोज्न सुरु गरेका छन् ।
नेकपा एमाले परित्याग गरेर माधव नेपाल नेतृत्वको नेकपा (एकीकृत समाजवादी) पार्टीमा जान चाहने स्थानीय तहका जनप्रतिनिधिले जिल्ला निर्वाचन कार्यालयमा पुगेर सनाखत गर्न थालेका हुन् ।
बुधबार कैलालीको मोहन्याल गाउँपालिकाकी कार्यबाहक अध्यक्ष पूजा बुढामगर, कार्यपालिका सदस्य विशाल पहराई र वडा सदस्य चन्द्रकला कामीले एकीकृत समाजवादीको पक्षमा सनाखत गरेका छन् । समाजवादी पार्टी रोजेका तीनै जनाले निर्वाचन कार्यालयमा गएर सनाखत गराएका छन् ।
मोहन्याल गाउँपालिका अध्यक्ष नवलसिंह रावलको विरामीका कारण मृत्युभएपछि बुढामगर कार्यकारी प्रमुखको भूमिका निर्वाह गर्दै आएकी छन् ।
मंगलबार मात्रै सुदूरपश्चिम प्रदेश सभाका १० जना सदस्यले एमाले छाडेर एकीकृत समाजवादी रोजेका थिए । अन्य तीन जना प्रदेश सांसदले आज सनाखत गर्ने भनिएकोमा भोलि स्थानीय तहका जनप्रतिनिधिसँगै सनाखत गर्ने तयारी गरेको जनाएको छ ।
नेकपा एकीकृत (समाजवादी) पार्टीमा जान इच्छुक नेकपा एमालेका प्रदेशसभा सदस्य, स्थानीय तहका जनप्रतिनिधि र जिल्ला समन्वय समितिका सदस्यहरुलाई सनाखतको लागि भदौ २२ गतेसम्मको समयसीमा तोकिएको छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।