कैलालीका लोकुन (लोकेन्द्र) डगौरा थारु ३३ वर्षअघि २९ वर्षको उमेरमा रोजगारीको सिलसिलामा भारत गएका थिए । हाल लोकुन ६२ वर्षका भए ।
जिल्लाको जानकी गाउँपालिका–७ टिकलीगढबाट उनी भारतको सिम्ला गएका थिए । त्यहाँ गइसकेपछि उनी सम्पर्कविहीन बने । परिवारले उनलाई खोज्ने धेरै प्रयास गर्यो । उनको अत्तोपत्तो लाग्न सकेन । कहिँकतै फेला नपरेपछि परिवारले उनीसँग भेट हुने आशा मारिसकेका थिए ।
तर, प्रहरीको सहयोगमा लोकुन भेटिएपछि परिवार खुशीले गद्गद् भएको छ । हाल लोकुनका छोरा रामबहादुर ३८ वर्षका भए । आफ्ना बुवासँग ३३ वर्षपछि भेट भएपछि उनीसँगै सबै परिवार हर्षित बनेको हुन् ।
यहि भदौ ९ गते भारतको बिहारस्थित गयामा उनलाई भारतीय नागरिक सन्दीप यादवले फेला पारे । सन्दीपले डगौरालाई सोधपुछ गरेर आफ्नो घरमा लगे ।
कैलाली घर बताउने डगौरा १० गते उनको घरबाट भागे । खोजी गरेर पुनः सन्दीपले आफ्नो घरमा लगेर राखे । आफ्नो घर नेपाल नै भएको बताएपछि सन्दीपले नेपाल प्रहरीमा सम्पर्क गरे ।
त्यसपछि नेपालको तर्फबाट प्रहरी परिसर टेकु काठमाडौंका प्रमुख प्रहरी वरिष्ठ उपरीक्षक अशोक सिंहले भारतीय पक्षसँग समन्वय गरी उद्दार गर्न आग्रह गरेका थिए ।
उक्त जानकारी पछि कैलालीका प्रहरी प्रमुख विश्व अधिकारीले सन्दीप यादवमार्फत लोकुन डगौरा थारुसँग सम्पर्क (भिडियोकल) गरेका थिए ।
लोकुन डगौरा थारुले सबै कुरा बिर्सिसकेका थिए । तर उनले प्रहरी उपरीक्षक अधिकारीसँग आफ्नो घर टीकापुरको मनुवा आसपास हो सम्म भनेका थिए ।
उक्त कुराकानीपछि कैलाली प्रहरीले टोली परिचालन गरी उनका आफ्न्त पत्ता लगाउने प्रयास गर्यो । अन्ततः उनको घर पत्ता लाग्यो । ठेगाना र आफन्त फेला परेपछि लोकुन डगौरालाई भारतीय प्रहरी र सन्दीप यादवको सहयोगमा जिल्ला प्रहरी कार्यालय, पर्सामा झिकाइयो ।
प्रहरी कार्यालय पर्साबाट पनि लोकुनका छोरा र प्रहरी टोली पठाएर कैलालीमा ल्याइएको जिल्ला प्रहरी कार्यालय कैलालीका प्रवक्ता प्रहरी नायब उपरीक्षक प्रतीक विष्टले बताए ।
जिल्ला आइपुगेपछि बिहीबार लोकुको परिवारसँग पुनर्मिलन गराइएको प्रहरी नायब विष्टले बताए ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।