नेकपा (एकीकृत समाजवादी) का अध्यक्ष माधवकुमार नेपालले केपी शर्मा ओली सुध्रिने छाँट नदेखिएकाले भ्रममा नपर्न सबैलाई आग्रह गरेका छन् । 

नेपालले पार्टीभित्र ल्याउने र हुर्मत लिने ओलीको योजना रहेको भन्दै अहिलेसम्म आफूले चालेको प्रतिगमनको कतै पनि स्वीकारोक्ति नरहेको उनले बताए । 

उनले भने, ‘अहिलेसम्म प्रतिगमनको कदम चालियो र गल्ती गरियो भन्ने स्वीकारोक्ति छैन । फागुन २८ गते गरेको बैठक एकलौटी गरिएको बैठक गलत ढंगले भएको थियो भन्ने आत्मआलोचना छैन । केपी ओली  सुध्रिने छाँट छैन । त्यसैले भ्रममा नपर्न म सबैलाई हार्दिक आव्हान गर्न चाहन्छु।’ 

उनले २७ गते राति १० बुँदे सहमतिमा हस्ताक्षर गर्नु २८ गतेको सर्वोच्चको फैसलालाई प्रभावित पार्ने कुनियत मात्रै भएको बताए । 

उनले १० बजे राति अधुरो र दुई नेताबीचको सहमतिको कुनै विषय नभएको सहमतिमा हस्ताक्षर गर्न हतारो गरिनुले ओलीमा त्यो कुनियत लुकेको देखिएको उनको भनाई छ ।