नेपाल टेलिकमले फोर जी सेवालाई अझै गुणस्तरीय बनाउने बताएको छ । सोमबार पत्रकार सम्मेलनमा बोल्दै नेपाल टेलिकमका प्रबन्ध निर्देशक डिल्लीराम अधिकारीले टेलिकमको फोर जी सेवालाई अझ गुणस्तरीय बनाउने बताएका हुन् । 

प्रबन्ध निर्देशक अधिकारीले ५ जी सेवालाई परीक्षणमा लैजाने प्रक्रिया आरम्भ गर्ने र देशभर फाइबर बिच्छ्याउने कामलाई तीव्रता दिने बताए । आगामी दिनमा कोरोना संक्रमणका कारण टेलिकमको काम नरोकिने पनि उनले स्पष्ट पारे । 

टेलिकमले कल ट्यापिङ गर्ने भनेर चलेको हल्लाको पछि नलाग्न प्रबन्ध निर्देशक अधिकारीले सबैमा आग्रह गरे । टेलिकमसँग कल ट्यापिङ गर्ने उपकरण नै नभएको उल्लेख गर्दै उनले भने, ‘कल ट्यापिङ गर्ने एलआई भन्ने उपकरण हुन्छ । त्यो उपकरण आयात गर्न दूरसञ्चार प्राधिकरणको अनुमति चाहिन्छ । हामी दूरसञ्चार सेवा प्रदायकले एलआई इक्विपमेन्ट किन्न पाउँदैनौँ ।’

टेलिकमले सस्तो, गुणस्तरीय सेवा देशभरका सम्पूर्ण भेगमा पुर्याउने दायित्वका साथ काम गरिरहेको उनले बताए ।