मोरङ, बारा र चितवनमा भएका सवारी दुर्घटनामा तीन जनाको मृत्यु भएको छ । 

मोरङको विराटनगर महानगरपालिका–१५ मा बिआर ३८ टि २१६४ नम्बरको मोटरसाइकल अनियन्त्रित भई सोमबार दुर्घटना हुँदा चालक भारत जोगबनीका कुन्दन साहको मृत्यु भएको छ । 

दुर्घटनामा गम्भीर घाइते भएका उनको न्यूरो अस्पताल विराटनगरमा उपचारको क्रममा मृत्यु भएको प्रहरीले जनाएको छ । दुर्घटनामा घाइते भएका मोटरसाइकलमा सवार सोही ठाउँ बस्ने ३२ वर्षीय अर्जुन सिंहको सोही अस्पतालमा उपचार भइरहेको छ । 

बाराको जितपुरसिमरा उपमहानगरपालिका–१६ मा ना.६ ख २११० नम्बरको बसको ठक्करबाट पैदलयात्रीको मृत्यु भएको छ । मृत्यु हुनेको पैदलयात्रीको हाल नाम थर, वतन खुल्न सकेको छैन । पैदलयात्री अन्दाजी ४५ वर्षीय पुरुषको गएराति घटनास्थलमै मृत्यु भएको प्रहरीले जानकारी दिएको छ । बस चालकलाई प्रहरीले नियन्त्रणमा लिएको छ । 

चितवनको भरतपुर महानगरपालिका–१० मा लु.२ ख १५८२  नम्बरको बसको ठक्करबाट पैदलयात्रीको मृत्यु भएको छ । मृत्यु हुनेमा लमजुङ बेसिशहर नगरपालिका–६ बस्ने २२ वर्षीय बिनोद अधिकारी रहेका छन् । उनको सोमबार राति मृत्यु भएको छ । 

दुर्घटनामा गम्भीर घाइते भएका उनको नयाँ मेडिकल कलेज भरतपुरमा उपचारको क्रममा मृत्यु भएको हो । साथै सोही बसको ठक्करबाट घाइते भएका लमजुङ बेसिशहर नगरपालिका–६ बस्ने २० वर्षीय महादेव भण्डारीको सोही अस्पतालमा उपचार भइरहेको छ । बस चालकलाई प्रहरीले नियन्त्रणमा लिएको छ ।