नेपाल भ्रमणमा रहेकी मिलेनियम च्यालेन्ज कर्पोरेसन (एमसिसी)की उपाध्यक्ष फातिमा सुमारलाई नेकपा एमालेका अध्यक्ष केपी शर्मा ओलीले एमसिसीका विषयमा सरकार स्पष्ट नभएको बताएका छन् ।
नेपाल आएकै दिन ओलीलाई भेट्न बालकोट पुगेकी फातिमालाई सरकारले स्पष्ट धारणा बनाएपछि मात्र एमालेले धारणा बनाउने जानकारी दिए ।
भेटवार्तामा सहभागी एक एमाले नेताका अनुसार फातिमाले सुरुमा नै एमसिसीका विषयमा एमालेको धारणा जान्न चाहेकी थिइन् ।
‘पहिला नेपाल सरकारले एमसिसीका विषयमा आफ्नो धारणा बनाउनु पर्छ । सरकारको धारणा स्पष्ट छैन । सरकारले स्पष्ट धारणा बनाएपछि मात्र हामी आफ्नो धारणा बनाउँछौ र सार्वजनिक गर्छौं,’ पूर्वप्रधानमन्त्री समेत रहेका ओलीको भनाई उद्धृत गर्दै ती नेताले भने ।
एमसिसीका सहायक उपाध्यक्ष जोनाथन ब्रुक्सलाई समेत साथमा लिएर ओली निवास पुगेकी फातिमाले एमसिसीलाई नेपालको संसदले अनुमोदन गरोस् भन्ने अमेरिकी चाहना रहेको बताइन् । ‘हामी चाहन्छौं यस प्रक्रियामा एमालेले सरकारलाई सहयोग गरोस्,’ फातिमाले ओलीलाई भनिन् ।
ओलीले सरकारको नेतृत्व गर्दा अमेरिकी ५० करोड डलरको सहयोग कार्यक्रमा एमसिसी संसदबाट पास गर्ने प्रयास गरेका थिए । तर नेकपा माओवादी केन्द्र र सभामुखका कारण एमसिसी संसदमा प्रस्तुत हुन सकेको थिएन । माओवादी केन्द्रले एमसिसीको विरोध गर्दै आएको छ ।
सरकारबाट बाहिरिए पछि नेकपा एमालेले एमसिसीका विषयमा आफ्नो आधिकारिक धारणा सार्वजनिक गरेको छैन । एमालेका नेता भीम रावलले भने सुरु देखि नै एमसिसीको विरोध गर्दै आएका छन् । अहिले सरकारमा माओवादी केन्द्र पुगेको छ । प्रधानमन्त्री शेरबहादुर देउवा एमसिसीलाई संसदबाट पास गराउने पक्षमा छन् भने माओवादी केन्द्र अझै यसको विरोधमा छ । यहीबीचमा एमसिसीकी उपाध्यक्ष फातिमाले नेपाल भ्रमणमा आएकी हुन् ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।