प्रमुख प्रतिपक्षी दल नेकपा एमालेले प्रतिनिधिसभा बैठकमा अवरोध कायमै राखेको छ । सभामुख अग्निप्रसाद सापकोटाले भने आफू संविधान, नियम कानुन अनुसार पहलकदमी लिने कुरामा प्रतिवद्ध भएको भन्दै सदनको अवरोध हटाउन आग्रह गरिरहेका छन् । 

नवौं अधिवेशनको पहिलो बैठकदेखि नै निरन्तर अवरोध गर्दै आएको एमालेले सभामुखको भूमिकामाथि प्रश्न उठाएका छन् । एमाले सांसदलाई जवाफ दिँदै सभामुखले भने, ‘संसदीय मर्यादा कायम गर्ने दायित्व हामी सबैको हो । सभामुखले संविधान, नियम कानुन अनुसार पहलकदमी लिने कुरामा म प्रतिवद्ध छु । यसको पहल कदमी लिने कुरा हामी सबैको दायित्व हो । त्यतातर्फ पनि मनन गर्न म सबैलाई आग्रह गर्दछु ।’

सभाामुख सापकोटाले संविधान नियम काननु अनुसार अघि बढ्ने मूल मान्यता बनाउँदै आएको भन्दै सबै सांसदलाई अवरोध खोल्न आग्रह गरेका छन् । यसअघि आजै बसेको अर्को बैठकमा सभामुख सापकोटाले अवरोध नहटेपछि १५ मिनेटका लागि स्थगित गरेका थिए । 

त्यसपछि एमालेका नेताहरूसँग छलफल गरेका सभामुखले सहमति भने जुटाउन सकेनन् । अहिलेपनि एमालेको अवरोध कायमै छ ।  सभामुख सापकोटाले एमाले प्रमुख सचेतक विशाल भट्टराई, सचेतक शान्ता चौधरी र खगराज अधिकारीसँग छलफल गरेका थिए ।