बागमती प्रदेश सरकारकी मुख्यमन्त्री अष्टलक्ष्मी शाक्यले  विश्वासको मत लिने प्रस्ताव पेश गरेपछि प्रदेशसभाको बैठक स्थगित भएको छ । नवौं अधिवेशनको दोस्रो बैठक स्थगित भएको हो । अब अर्को बैठक कात्तिक ४ गते दिउँसो १ बजे बस्नेछ ।  

आजको दोस्रो बैठकमा मुख्यमन्त्री शाक्यले विश्वासको मतको लागि प्रस्ताव पढेर सुनाउने वित्तिकै सभामुख सानुकुरमा श्रेष्ठले बैठक स्थगित गरेका हुन् । 

शाक्यले आफ्नो दल नेकपा एमाले विभाजन भएकाले संविधानको धारा १८८ को उपधारा २ तथा प्रदेशसभा नियमावली २०७४ को नियम १४३ को उपनियम १ बमोजिम विश्वासको मतको लागि प्रस्ताव पेश गरेकी थिइन् ।  

कार्यव्यवस्था परामर्श समितिमा दोस्रो बैठकमा विश्वासको मत लिने सहमतिलाई सभामुखले लत्याएको भन्दै प्रमुख प्रतिपक्ष दल नेकपा माओवादी केन्द्रका सांसदहरुले सभामुखको आलोचना गरेका छन् । 
 
आजको बैठकमा विश्वासको मत नलिएसँगै मुख्यमन्त्री शाक्य नेतृत्वको सरकार दशैं पछि सम्म टिक्ने पक्का भएको छ ।