अष्ट्रेलियाको सिड्नी शहरमा लकडाउन अन्त्य भएको छ । कोरोनाभाइरसको महामारीका कारण जारी गरिएको लकडाउन १०६ दिनपछि सोमबारदेखि लकडाउन अन्त्य भएको हो । 

अहिले महामारीको असर कम भएकाले लकडाउनको आवश्यकता नरहेको ठहर गदै अन्त्य गरिएको अधिकारीहरुले बताएका छन् । 

देशको सबैभन्दा ठूलो शहर मानिने सिड्नीमा झण्डै ५० लाख मानिस बसोबास गर्छन । लामो समयदेखिको लकडाउनका कारण धेरै मानिस प्रभावित बनेका थिए । 

सिड्नी समेत पर्ने न्यू साउथ वेल्स प्रदेशमा ७० प्रतिशतभन्दा बढीले कोरोना भाइरसविरुद्धको खोपको पूर्ण मात्रा लगाएका छन् ।  

झण्डै चार महिनापछि लकडाउन अन्त्य भएको पहिलो दिनलाई कतिपयले स्वतन्त्रता दिवसको संज्ञा पनि दिएका छन् । उनीहरुले लकडाउन अन्त्य भएपछि धेरै खुसीयाली र स्वतन्त्रताको अनुभूति भएको बताएका छन् । लकडाउन अन्त्य भएसँगै पसलहरु खुल्न थालेका छन् । पसल खुलेसँगै अधिकांश किनमेलका लागि निस्किएका छन् ।  

गत जुनदेखि सिड्नीका पसल, विद्यालय, सैलुन र कार्यालयहरु बन्द गरिएको थियो । अत्यावश्यक सेवा भने सञ्चालिन नै थिए । त्यसैगरी अत्यावश्यक सामग्री किनमेल गर्नका लागि पनि घरदेखि पाँच किलोमिटर भन्दा टाढा जान नपाइने व्यवस्था गरिएको थियो । 

महामारी नियन्त्रणका लागि अष्ट्रेलियाको केन्द्रीय र प्रदेश सरकारहरुले सिमानाका बन्द गर्ने, लकडाउन गर्ने, स्वास्थ्य मापदण्ड कडाइका साथ पालना गराउने र तिव्र रुपमा कोरोना परीक्षण गराउने लगायतका कार्य गर्दै आएका थिए ।