नेकपा एमालेका संसदीय दलका नेता सुवासचन्द्र नेम्वाङले सत्ता गठबन्धनमा एक दल थपिएको बताएका छन् । सत्तारुढ दलहरुले पाँच दलको गठबन्धन भन्ने गरेपनि सरकारमा छैटौं दल थपिएको दाबी उनले गरेका हुन् ।
सोमवार काठमाडौंमा तत्कालीन राप्रपाका नेता स्व. चन्द्रबहादुर गुरुङको स्मृतिमा आयोजित स्मृति सभा तथा प्रतिष्ठानको स्थापना दिवस कार्यक्रममा बोल्दै नेम्वाङले सरकारमा छैटौं दल थपिएको प्रमाणित भएको बताए ।
‘होइन अहिले ५ दलको गठबन्धन छ भनियो, फेरि अर्को छैटौं थपियो रे भन्ने चर्चा र हल्ला छ, त्यो छैटौँ पक्षबाट मन्त्री पनि हुनुभयो, तीन दिनमा राजीनामा पनि दिनुभयो, भनेपछि त्यो कुरा त साँच्चै रहेछ,’ नेम्वाङले भने ।
प्रधानन्यायाधीश चोलेन्द्र शमशेर जबरा तर्फ व्यंग्य गर्दै तीन दिन मन्त्री भएको र राजीनामा दिएकोले गठबन्धन सरकारमा छैटौं दल समावेश भएको पुष्टि हुने तर्क उनले गरेका हुन् ।
उनले यो विषय जटिल भएको बताउँदै यसमा नागरिक समाज र राजनीतिक दलहरुले छलफल गर्नुपर्ने बताए ।
‘यस्ता इस्युहरु उठेको सन्दर्भमा राजनीतिक दलहरुले र नागरिक समाजले व्यापक छलफल गर्नुपर्छ । सिंगो देश यो सन्दर्भमा छलफल गरेर निर्णयमा पुग्ने प्रक्रिया त्यो नै प्रजातन्त्र हो । समसामयिक विषय थुप्रै छन् जसको हामीले छलफल गर्नुपर्छ,’ नेम्वाङले भने ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।