दसैं नेपालीहरुका लागि मीठो खाने, राम्रो लगाउने पर्व । दसैंमा हरेक नेपालीको घरमा गच्छे अनुसारको मीठोमसिनो पाक्ने गर्छ । दसैंमा विशेष गरेर हरेकको भान्छामा मासु पाक्ने गर्छ । दसैंमा विशेष गरेर खसीको मासुनै खाने चलन छ । प्रायः मानिसको घरमा खसी काट्ने हुनाले धेरैथरीका परिकार बनाउन सकिन्छ । 

खसीको पक्कु

खसीको पक्कु प्रायः घरमा पाक्ने गर्छ । सबैले आ–आफ्नै विधि र सामग्री अपनाउँछन् । 

पक्कुका लागि आवश्यक सामग्री

• खसीको मासु आवश्यकता अनुसार
• तोरीको तेल, मासुको परिमाणअनुसार
• अदुवा लसुनको पेस्ट
• जिरा, धनियाँको पाउडर
• सुकुमेलको धुलो 
• मरिचको धुलो
• घ्यु
• तेज पत्ता
• नुन, स्वाद अनुसार ।

तयारी विधि

• खसीको मासुलाई सानोसानो पिस गरेर काट्ने
• तयार पारेको सबै मसला हालेर मज्जाले मोल्ने, अर्थात् मेरिनेट गर्ने । 
• यसरी मेरिनेट गरेको मासु कम्तीमा आधा घण्टा छोपेर राख्ने ।
• त्यसपछि बाक्लो पित्तलको कसौंडीमा मन्द आगोमा पकाउन सुरु गर्ने । बीचबीचमा मासु चलाइराख्नुपर्छ । 
• पाक्दै जाँदा मासुको पानी सुक्दै जान्छ । अन्त्यमा घिउ राखेर चलाउने । त्यसपछि पक्कु तयार हुन्छ ।
• पक्कु तयार भएपछि पनि १० मिनेट छोपेर राख्नुपर्छ । जसले पक्कुलाई स्वादिलो बनाउँछ । 

दसैंमा खसीको मासुको पक्कु बनाउने प्रचलन पुरानै हो । पहिलापहिला घरघरमा फ्रिज हुँदैनथ्यो, तर दसैंमा मासुको मात्रा धेरै हुन्थ्यो । त्यसैले मासु धेरै दिनसम्म नबिग्रियोस् भनेर पक्कु बनाउने गरिन्थ्यो । 

खसीको लेदोबेदो

​आवश्यक सामग्री 

• मासु १ केजी (परिवारको आकार र आवश्यकता अनुसार मासुको परिमाण थप–घट गर्न सकिन्छ ।)
• प्याज २ वटा
• गोलभेँडा मध्यम आकारको २ वटा
• दुई चम्चा अदुवा–लसुनको पेस्ट
• एक चम्चा गरम मसला (ल्वाङ, सुकमेल, जाइफल, मरिच, दालचिनी)
• एक चम्चा धनीयाँ, बेसार, खुर्सानी, जिराको धुलो
• तीन चम्चा तोरीको तेल
• एक मुठा धनियाको पात
• आधा चम्चा टिमुरको धुलो
• एक चम्चा मेथी 
• नुन, स्वादअनुसार ।

तयारी विधि

• कराईमा तोरीको तेल तताउनुहोस् । (भाँडाको प्रयोग गर्दा आफ्नो घरमा उपलब्ध भएको र आफ्नो चलन अनुसार प्रेसरकुकर, हाँडी, कसौडीको प्रयोग गर्न सक्नुहुन्छ ।)
• तेल तातेपछि मेथी फुराउनुहोस् । त्यसपछि प्याज रातो पारेर भुट्नुहोस । 
• प्याज राम्रोसँग भुटिएपछि एक चम्चा बेसार राख्नुहोस् । त्यसपछि तेजपत्ता हालेर राम्रोसँग चलाउनुहोस् । 
• अब मासु राखेर त्यसलाई राम्रोसँग भुट्नुपर्छ । 
• मासु भुट्ने क्रममा तयार पारेर राखेको मसला, स्वाद अनुसार नुन हाली मन्द आगोमा पकाउनु पर्छ । 
• मासु राम्रोसँग भुटिएपछि गोलभेँडा हालेर राम्रोसँग पकाउनु पर्छ । अन्त्यमा माथिबाट हरियो धनियाँ राखिदिने । 
• यति गरेपछि खसीको लेदोबेदो तयार हुन्छ ।