सरकारले राष्ट्रिय खेलकुद परिषद्का सदस्यसचिव रमेशकुमार सिलवाललाई बर्खास्त गरेको छ । 

सोमबार बसेको मन्त्रिपरिषद् बैठकले सदस्यसचिव सिलवाललाई बर्खास्त गर्ने निर्णय गरेको हो । मन्त्रिपरिषद् बैठकले सदस्यसचिव सिलवालले यसअघि सोधिएका स्पष्टिकरणको चित्तबुझ्दो जवाफ नदिएकाले उनलाई बर्खास्त गर्ने निर्णय गरेको हो ।

यसअघि सिलवाललाई खेलकुद मन्त्रालयमार्फत् दुई पटक स्पष्टिकरण सोधेको थियो । 

तर, उनले दिएको जवाफ चित्तबुझ्दो नभएको मन्त्रिपरिषद् बैठकले निष्कर्ष निकालेको छ । 

२०७६ साल असारमा पहिलो पटक खेलकुद परिषद्मा सदस्यसचिव नियुक्त भएका सिलवाल दोस्रो पटक गत साउनमा सदस्यसचिव नियुक्त भएका थिए । उनी नेकपा एमाले अध्यक्ष केपी ओलीनिकट मानिन्छन् ।

यसअघि १३ औं दक्षिण एशियाली खेलकुद आयोजना गर्दा नेतृत्व दिएका सिलवालले व्यापक अनियमितता गरेको आरोप लाग्ने गरेको छ ।