टर्कीका राष्ट्रपति रिसेप तैयप एर्दोगानले घरेलु मामिलामा हस्तक्षेप गर्न खोजेको भन्दै अमेरिकासहित १० देशका राजदूतलाई अवान्छिन व्यक्ति घोषित गर्दै देश छाड्न आदेश दिएका छन् ।
उनले टर्कीको विदेश मन्त्रालयलाई यो आदेश कार्यान्वयन गर्न निर्देशन दिएका हुन् ।
अमेरिकासहित १० देशका राजदूतले टर्कीका अभियन्ता उस्मान कवलालाई रिहा गर्न माग गर्दै विज्ञप्ति जारी गरेका थिए । उस्मान कवला चार वर्षदेखि जेलमा छन् ।
उनीमाथि सन् २०१३ मा देशव्यापी विरोध प्रदर्शनका लागि रकम जम्मा गरेको आरोप लागेको छ । टर्कीले सन् २०१६ मा भएको असफल सैन्य ‘कू’ मा पनि उस्मानको हात रहेको आरोप लगाएको छ ।
उनले भने आफूमाथि लागेको आरोप अस्वीकार गर्दै आएका छन् । उनलाई सन् २०१७ मा पक्राउ गरी दोषी ठहर नगरी जेलमा राखिएको छ ।
१८ अक्टोबरमा अमेरिका, फ्रान्स, जर्मनी, क्यानडा, डेनमार्क, नेदरल्याण्ड, नर्वे, स्वीडेन, फिनल्याण्ड र न्युजिल्याण्डका राजदूतले संयुक्त विज्ञप्ति जारी गर्दैै उनको रिहाईको माग गरेका थिए । उनीहरुले उस्मान कवलाका विषयमा तत्काल निर्णय लिन दबाब दिएका थिए ।
टर्कीले राजदूतहरुको विज्ञप्ति गैरजिम्मेवार भएको बताएको छ । टर्कीको विदेश मन्त्रालयले यी देशका राजदूतलाई ‘परसोना नन ग्राटा’ घोषित गरेको छ । यसको अर्थ राजदूतलाई अवान्छित व्यक्ति घोषणा गरिएको हो । १० देशका राजदूतलाई ४८ देखि ७२ घन्टाभित्र देश छाड्न आदेश दिएको हो ।
कुनै पनि देशले कूटनीतिज्ञलाई देश निकाला गन सक्ने भए पनि राजदूतलाई नै देश निकाला गरेकाले टर्कीले गरेको कारबाही अन्तर्राष्ट्रिय नियम विपरीत हुन सक्छ । टर्कीले यसअघिदेखि नै अमेरिकाको कडा प्रतिबन्धको सामना गरिरहेको छ । यद्यपि यस विषयमा पश्चिमा राष्ट्रको कुनै प्रतिक्रिया आएको छैन ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।