इंग्लिस प्रिमियर लिगमा म्यानचेस्टर सिटीले सहज जित निकालेको छ । उसले शनिबार राति भएको खेलमा घरेलु टोली ब्राइटनलाई ४-१ ले पराजित गरेको हो ।
सिटीको जितमा फिल फोडेनले दुई तथा इल्के गुन्डोगन र रियाद महरेजले एक-एक गोल गरे । ब्राइटनका एलेक्सिस म्याक एलिस्टरले एक गोल फर्काए ।
खेलको १३औं मिनेटमा गुन्डोगनले गोल गर्दै सिटीलाई सुरुआती अग्रता दिलाएका थिए । २८औं मिनेटमा फोडेनले गोल गर्दै टोलीको अग्रतालाई दोब्बर बनाए ।
३१औं मिनेटमा फोडेनले व्यक्तिगत दोस्रो गोल गरेपछि सिटीले पहिलो हाफमा ३-० को आरामदायी अग्रता लियो ।
८१ औं मिनेटमा ब्राइटनका एलिस्टरले पेनाल्टीबाट एक गोल गर्दै खेललाई ३-१ को स्थितिमा ल्याए । थप गरिएको समयमा महरेजले गोल गर्दै सिटीलाई सहज जित दिलाए ।
यो जितसँगै सिटी ९ खेलमा २० अंक जोडदै दोस्रो स्थानमा उक्लिँदा समान खेलबाट ब्राइटन १५ अंकका साथ चौंथो स्थानमा छ ।
लिग अन्तर्गत शनिबार नै भएका अन्य खेलमा वाट्फोर्डले एभर्टनमाथि ५-२ को सहज जित हात पार्दा साथह्यामटन र बर्नेली २-२ को बराबरीमा रोकिए ।
क्रिस्टल प्यालेसले न्युकासल युनाइटेड तथा लिड्स युनाइटेडले उल्फ्ससँग समान १-१ को बराबरी खेले ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
