Mon, 19 Nov, 2018


पिपिएलको फाइनलमा पोखरा र चितवन भिड्ने
फरक धार  |  कात्तिक १८, २०७५

काठमाडौं– पोखरामा जारी पहिलो पोखरा प्रिमियर लिग (पिपिएल) को फाइनलमा पोखरा पल्टन र चितवन राइनोज भिड्ने भएका छन् । आइतबारको खेलमा हुलास काठमाडौं रोयललाई ६ विकेटले हराएपछि चितवन राइनोजले पोखरासँगको भेट पक्का गरेको हो । 

यसअघि, तालिकाको शीर्ष स्थानमा रहँदै पोखरा फाइनलमा प्रवेश गरेको थियो ।

आइतबारको एलिमिनेसनमा टस जितेर ब्याटिङ रोजेको काठमाडौंले सबै विकेट गुमाउँदै ९४ रन बनाएको थियो । ९५ रनको झिनो लक्ष्य पछ्याएर जवाफी ब्याटिङमा उत्रेको चितवनले १० बल बाँकी छँदै लक्ष्य भेट्टायो । 

चितवनका सुमित पटेलले ३८, हरिशंकर शाहले २६ तथा अरिफ शेखले नटआउट २० रन जोडे । 

काठमाडौंका सुसन भारीले ३ तथा पवन सर्राफले १ विकेट लिए । अन्य बलर भने सफल हुन सकेनन् । 

कप्तान ज्ञानेन्द्र मल्लले ३० तथा जयकिसन कोल्सावालले २५ रन बनाए पनि अन्य ब्याट्समेनले दोहोरो अंकमा रन जोड्न नसक्दा काठमाडौंले दुई अंकाको टोटलमै चित्त बुझउनुपर्यो, जुन चितवनका लागि सहज लक्ष बन्यो । 

काठमाडौंलाई सस्तैमा समेट्ने क्रममा चितवनका सन्नी पाटेलले ३ विकेट लिए । यस्तै, भुवन कार्की र सुमित पन्तले समान २ तथा करण केसीले १ विकेट लिए । 

पोखरा र चितवनबीचको फाइनल खेल मंगलबार पोखरा रंगशालामा हुनेछ । 
 



यो पनि नछुटाउनुहोस्