१४औं महाधिवेशनको प्रक्रिया अघि बढाएको नेपाली कांग्रेसले रसुवा र रौतहटको विवादलाई नीतिगत रूपमा निरुपण गरिसकेको नेता प्रदीप पौडेलले बताएका छन् । 

उनका अनुसार सबै वडा, क्षेत्र र जिल्लाको समस्यालाई कसरी समाधान गर्ने भन्ने निर्णय कांग्रेसले गरिसकेको छ । सचिवालयबाट कार्यान्वयनको सन्दर्भमा मात्रै ढिला भएको पौडेल बताउँछन् । 

‘रसुवाको विवाद निरुपणले अन्तिम रूप पाइसक्यो । अब रौतहटमा के गर्ने भन्ने नीतिगत निर्णय पहिल्यै भएको हो र कार्यान्वयनमा मात्रै ढिला भएको हो’, यसअघि क्रियाशील सदस्यता छानबिन समितिका सदस्यसमेत रहेका नेता पौडेलले फरकधारसँग भने ।

सबै जिल्लामा निर्वाचन अधिकृत नतोकिएको र तोकिए पनि क्रियाशील सदस्यताको अन्तिम सूची निर्वाचन अधिकृतले नपाइसकेकाले पनि काम अघि नबढेको हुनसक्ने उनको भनाइ छ । 

१३ वटा हिमाली जिल्लामा जिल्ला अधिवेशन भइसक्दा रसुवा र रौतहटको विवाद निरुपण बल्ल भएको हो । तर, क्रियाशील सदस्यता विवरण सार्वजनिक हुन सकेको छैन । 

यसअघि नै सदस्यता सार्वजनिक भएकामध्ये पनि ११ जिल्लामा वडा अधिवेशन भएको छैन ।