नेपाली कांग्रेसको १४औँ महाधिवेशन आउन एक महिना बाँकी रहँदा शीर्ष नेताहरु आ–आफ्नो समूहमा छलफलमा जुटेका छन् । पार्टी सभापति शेरबहादुर देउवाले बिहीबार बालुवाटारमा आफूनिकट नेताहरुसँग आन्तरिक छलफल गरेका छन् । वरिष्ठ नेता रामचन्द्र पौडेलले पनि शुक्रबार दिउँसोका लागि आफूनिकट पदाधिकारी र सदस्यको बैठक बोलाएका छन् । 

महाधिवेशनको तयारीका विषयमा छलफल गर्न सभापति एवम् प्रधानमन्त्री देउवाले आगामी आइतबार दिउँसो १ बजेका लागि केन्द्रीय कार्यसमितिको बैठक बोलाएका छन् । त्यसअघि नेताहरु आआफ्नो समूहमा छलफलमा जुटेका हुन् ।

देउवाले तीन महिनापछि केन्द्रीय समितिको बैठक बोलाएका हुन् । यसअघि केन्द्रीय समिति बैठक साउनको अन्तिम साता बसेको थियो । 

बिहीबार दिउँसो देउवाले उपसभापतिद्वय विमलेन्द्र निधि र विजयकुमार गच्छदार, महामन्त्री पूर्णबहादुर खड्का, सहमहामन्त्री प्रकाशशरण महतलगायत आफूनिकट नेताहरुसँग छलफल गरेका थिए ।