दुई समूहबीच गएराति भएको झगडामा एकजनाको हत्या भएको छ । मोरङको बूढीगंगा गाउँपालिका–६ कोयलपुरमा युवाहरूबीच कुटाकुट हुँदा सुनसीको खनारमा डेरा गरेर बस्ने २६ वर्षीय रिजन दाहालको हत्या भएको हो ।

जन्मदिनको पार्टीमा मदिरा पिएपछि दुई युवा समूहबीच विवाद भएको हो । बुढीगंगा–६ का २३ वर्षीय धने भनिने धनबहादुर तामाङ, २४ वर्षीय ईश्वर भनिने लिखमान लिम्बू र सुनसरीको इटहरी–११ का २२ वर्षीय राजु तामाङलगायतको समूहसँग दाहालको विवाद भएको थियो । 

विवादले उग्र रूप लिएपछि सातजनाको समूहले रिजनलाई खुकुरी प्रहार गरेको प्रहरीको भनाइ छ । खुकुरी प्रहारपछि गम्भीर घाइते भएका दाहालको उपचारका लागि अस्पताल लैजाँदै गर्दा बाटोमै मृत्यु भएको मोरङका डिएसपी दिपक श्रेष्ठले जानकारी दिए । उनको टाउकोमा चोट लागेको थियो ।

घटना छुट्याउन गएका नानु लिम्बु र कमल थापा पनि घाइते भएका छन् । लिम्बुको दाँया हातमा चोट लागेको प्रहरीले जनाएको छ ।

घाइते लिम्बुको घरमा उनका भतिजको जन्मदिनको अवसरमा पार्टी आयोजना गरिएको थियो । उनको घरमा दाहाल पनि पुगेका थिए । प्रहरीका अनुसार दाहाल र थापा दुवै खनारस्थित रिलायन्स स्पीनिंस मिलमा कार्यरत थिए ।