एजेन्सी– अमेरिकाको उत्तरी क्यालिफोर्नियाको जंगलमा लागेको भिषणमा आगोमा परी अहिलेसम्म ४२ जनाको मृत्यु भएको छ । यो राज्यको इतिहासमै आगलागीको सबैभन्दा भयावह घटना भएको बताइएको छ ।

अन्तर्राष्ट्रिय सञ्चारमाध्यमका अनुसार जंगलमा लागेको आगोका कारण घर, गाडी जलेर खरानी भएका छन् । जसमा रहेका धेरै मानिसहरुको आगोमा परेर मृत्यु भएको छ । 

रेस्क्यु टिमले जलेका गाडी तथा घरबाट मानिसका शवहरु झिकिरहेको सञ्चारमाध्यमले जनाएका छन् । सरकारी अधिकारीका अनुसार अधिकांश मानिसहरु भाग्न नभ्याएर आगोमा जलेको भेटिएका छन् । 

आगलागीमा परी मृत्यु हुनेको संख्या अझै बढ्न सक्ने अनुमान गरिएको छ । आगोका कारण लगभग २७ हजार बस्ती भएका शहर पूर्ण रुपमा जलेको छ । मानिसको शव पहिचानका लागि डिएनए टेस्टका साहरा लिन परेको बताइएको छ ।