नेकपा एमालेका नेता महेश बस्नेतले दशौं महाधिवेशनमा सचिव पदका लागि उम्मेदवारी घोषणा गरेका छन् । रिपोर्टस क्लबमा आयोजित कार्यक्रमलाई सम्बोधन गर्दै एमाले केन्द्रीय सदस्य समेत रहेका नेता बस्नेतले आफ्नो उम्मेदवारी घोषणा गरेका हुन् । 

भक्तपुरबाट राजनीतिमा सक्रिय हुँदै आएका बस्नेतले यो महाधिवेशनमा चितवनमा पाँच लाखभन्दा बढी मानिस भेला हुने बताएका छन् । उनले अध्यक्ष केपी शर्मा ओलीलाई सवैमान्य हिसाबले स्थापित गर्न लागिरहेको बताए । 

एमालेको शान, मान र गौरव बढेको भन्दै भौगोलिक हिसाबले सानो भएपनि नेपाली जनता सार्वभौमसत्ताका हिसाबले कोहीभन्दा कमी हुन ओलीले नदिएको उनले बताए । साथै, उनले अध्यक्षका लागि भीम रावलले गरेको दाबीले राम्रो सन्देश नदिएको बताए । ‘हाम्रो चाहिँ चाहना के हो भने, विगतमा मधेशमा एमाले र ओलीविरुद्ध निशेष समेत गराइएको छ । २ नम्बर प्रदेशका धेरै भूभागमा ४ हजार ५ हजार मान्छे प्रवेश गराएर एमालेको छुट्टै माहोल उहाँले बनाउनुभएको छ’ बस्नेतले भने । 

बस्नेतले आफूहरू ०६४ सालदेखिकै कमजोर अवस्थामा ओलीले बलियो बनाउँदै यहाँसम्म ल्याएको पनि बताए । महाधिवेशनबाट पार्टीमा लामो समय बिताएका, सबै समुदायका र नयाँ पुस्तालाई समेट्नपर्ने उनले बताए । एमालेलाई संकट परेको बेलामा काँध थापेका नेताहरुलाई पनि समात्नुपर्ने उनले बताए । 

हिजो माधव नेपालको साथमा रहेका ‘१० भाइ’ नेताहरूलाई विवेकपूर्ण रूपमा समेट्नुपर्ने बस्नेतले बताए ।