धनुषा निर्वाचन क्षेत्र नम्बर–३ मा नेपाली कांग्रेसका उपसभापति विमलेन्द्र निधिले मनोमानी गरेको भन्दै असन्तुष्ट नेता–कार्यकर्ताले निधिविरुद्ध जनकपुरधामस्थित पार्टी कार्यालयमा विरोध प्रदर्शन गरेका छन् । 

उपसभापति निधिले धनुषाको क्षेत्र नम्बर–३ प्रतिनिधिसभा क्षेत्रीय अधिवेशनमा पार्टीको विधान र निर्वाचन प्रक्रिया विपरीत अलोकतान्त्रिक तरिकाले पदाधिकारी घोषणा गरेको आरोप लगाउँदै विरोध प्रदर्शन भएको हो । 

नेपाली कांग्रेसको जारी १४औँ महाधिवेशनको प्रतिनिधिसभा क्षेत्र नम्बर ३ को क्षेत्रीय अधिवेशनबाट आइतबार उपसभापति निधिका भाइ धीरेन्द्र निधिलाई क्षेत्रीय सभापति चुनिएका छन् । उपसभापति निधिले आफ्नै भाइलाई सभापति बनाएको भन्दै पार्टीभित्रकै अन्य नेता–कार्यकर्ताले विरोध जनाएका हुन् ।

पार्टी उपसभापति निधिले तानाशाही प्रवृत्ति देखाउँदै पदीय दम्भमा निर्वाचन प्रक्रियाविपरीत उद्घाटन सत्रको मञ्चबाटै पदाधिकारी घोषणा गरेको नेता शम्भुनाथ झाले आरोप लगाए । उनले सो निर्णय आफूहरुलाई मान्य नरहेको र अधिवेशन खारेजी हुनुपर्ने माग गरे । 

असन्तुष्ट नेता–कार्यकर्ताले जिल्ला निर्वाचन र केन्द्रीय निर्वाचन कार्यालयमा धनुषा क्षेत्र नम्बर ३ को अधिवेशन खारेजीको माग गर्दै निवेदन समेत पठाएका छन् । उनीहरुले जिल्ला निर्वाचन कार्यालयमा निवेदन दर्ता गराउन जाँदा त्यहाँ कोही नभेटिएपछि इमेलमार्फत निवेदन दर्ता गराएका हुन् ।
 
पार्टीका नेता प्रवेश चौधरीले भने, ‘क्षेत्र नम्बर ३ मा गरिएको पदाधिकारी चयनको गलत प्रक्रियाको हामीले विरोध गर्दै जिल्ला र केन्द्रीय निर्वाचन कार्यालयमा इमेलमार्फत निवेदन दर्ता गराएका छौँ ।’

चौधरीले आजसम्म इतिहासमै नभएको काम उपसभापति निधिले गरेको आरोप लगाए ।