राष्ट्रिय प्रजातन्त्र पार्टी (राप्रपा)को अध्यक्षमा पराजित भएपछि कमल थापा बिहा‍नैदेखि बरबराइ रहेका छन् । अध्यक्षमा जितेका राजेन्द्र लिङ्देनलाई बधाई दिँदै उनी जित्नुको पछाडि पूर्वराजाको हात रहेको भन्दै पहिला आक्रोश व्यक्त गरेका थिए । उनले विभिन्न माध्यमबाट आक्रोश तथा पीडा निरन्तर पोखिरहेका छन् । 

यसै क्रममा उनले फेरि सामाजिक सञ्जालमार्फत कवि राजेन्द्र थापाको कविता सम्झिएका छन् । उनले कवितामार्फत् आफ्नो मन फाटेको संकेत गरेका छन् । संयोग कस्तो पर्‍याे भने अध्यक्षमा जितेका लिङ्देन सपथ लिइरहेका छन् । यता थापाको मन फाट्यो । यही बेला उनलाई कवि राजेन्द्र थापाको पोहोर साल खुसी फाट्दा भन्ने कविताको याद आएको हो । 

उनले लेखेका छन्, ‘मेरो अन्तर्मनभित्र मेरो मान्यतामाथि गम्भीर प्रश्न चिन्ह खडा भएको अहिलेको अवस्थामा कवि राजेन्द्र थापाको यो कविता सम्झन मन लाग्यो:

पोहोर साल खुसी फाट्दा
जतन गरी मनले टालेँ
त्यही साल माया फाट्यो
त्यसलाई पनि मनले टालेँ
यसपाली त मनै फाट्यो
केले सिउने केले टाल्ने हो ?’ 

पराजित भएसँगै थापा निकै छटपटाइरहेका छन् । उनले तारन्तार सामाजिक सञ्जालमार्फत् कहिले पीडा त कहिले आक्रोश व्यक्त गरिरहेका छन् । यतिसम्म कि उनी सपथ ग्रहण कार्यक्रममा नै गएनन् । 

राजनीतिक संस्कारअनुसार आफू पराजित भए पनि सपथ ग्रहणमा सहभागी हुँदै विजयी हुने उम्मेदवारलाई बधाई दिने परम्परा छ । तर, थापाको मनै फाटेपछि के राजनीतिक संस्कार, के को राप्रपा !

मेरो अन्तर्मन भित्र मेरो मान्यता माथि गंभीर प्रश्न चिन्ह खडा भएको अहिलेको अवस्थामा कवि राजेन्द्र थापाको यो कविता सम्झन मन लाग्यो
"पोहोर साल खुशी फाट्दा
जतन गरि मनले टाले
त्यहि साल माया फाट्यो
त्यसलाई पनि मनले टाले
यसपाली त मनै फाट्यो
केले सिउने केले टाल्ने हो?"

— Kamal Thapa (@KTnepal) December 5, 2021