कलाकार तथा निर्माता दीपकराज गिरीले माओवादी अध्यक्ष पुष्पकमल दाहाल (प्रचण्ड) लाई प्रश्न गरेका छन् । उनले लामो स्टाटस लेख्दै प्रचण्डलाई प्रश्न गरेका हुन् ।  ‘प्रचण्ड कमरेडको पुरानो महावाणी– बुर्जुवा शिक्षा सामन्तीहरूको शिक्षा हो,’ उनले फेसबुकमा लेखेका छन् । 

उनले अगाडि लेखेका छन्, ‘यति भन्नाले धेरै मानिस अनपढ नै रहे र अहिले पनि पछुताइरहेका छन् । उहाँकै कतिपय कार्यकर्ताहरू अहिले बुढेसकालमा स्कुल गएर त्यही छुटेको पुरानो शिक्षा पढिरहेका छन् ।’

उनले फिल्म हल खोलेमा त्यो पनि बिलासितामै पर्ला कि नपर्ला भनेर प्रश्नसमेत गरेका छन् ।

‘अब आफ्नै कुरा गरौं,  फिल्म हल खोलौ भनेको त्यो फिल्म पनि बिलासिता मै पर्ला कि नपर्ला? सामन्तीहरूको लिष्ट मै परिएर भोलि फेरि अप्ठेरो पर्ला  भनेर सोधेको । कि ब्युटी पार्लर खोलौं?हुनत धनाढ्यका बूढीहरू, छोरीहरू जाने ठाउँ त्यो पनि पक्कै सामन्तवादी लगानी नै साबित होला?  अब के मा लगानी गरौं त? अब ती खाइनखाइ गरेर लहैलहै मा भएपनि लागेर ४७ लाख डिम्याट खाता खोलेका नव सामन्तहरूलाई के गर्ने त कमरेड? आफ्नो कमाई कहाँ लगाउने त रु ताकी हाम्रो लगानी सामन्तवादी लगानी नहोस ।’

गिरीले अनुरोध गर्दै अगाडि भनेका छन्, ‘प्लिज कमरेड भनिदिनुपर्‍यो, तपाइँको लगानी कहाँ छ? कि त्यहि लगानी गर्न पनि प्रेरित गरिदिनुपर्‍यो । मलाई सामन्त हुने मन फिटिक्कै छैन के गर्ने होला? कि  यसो गरौं विदेशी बैंकमै लागेर लागेर राखौं त कमरेड? त्यसो गर्दा कसो होला? जे जसरी हुन्छ मलाइ सामन्त हुनबाट बचाउनुस् कमरेड म हातै जोड्छु मलगायत थुप्रै जनताले जय गाउने छन् कमरेड !’