आज दिउँसोबाट नै सुरु हुने भनिए पनि विभिन्न विषयमा मत नमिल्दा कांग्रेसमा नयाँ उपसभापति छान्नका लागि भएको निर्वाचनको मतगणना केही बेरअघि मात्र सुरु भएको छ । 

यो मतगणना कांग्रेस पार्टी कार्यालय सानेपामा सुरु भएको हो ।

कांग्रेसको १४ औं महाधिवेशनले दुई जना उपसभापति चुन्नेछ । दुई जनाका लागि ६ जनाले उम्मेदवारी दिएका छन् । 

यसअघि कांग्रेस महाधिवेशनबाट शेरबहादुर देउवा सभापतिमा निर्वाचित भइसकेका छन् । देउवा कांग्रेस सभापतिमा निर्वाचित भएको यो दोस्रो पटक हो । कांग्रेस महाधिवेशनमा पहिलो चरणमा सभापतिका आकांक्षी पाँचै जनाले ५० प्रतिशत मत कटाउन नसकेपछि दोस्रो चरणको निर्वाचन भएको थियो । 

निर्वाचनमा देउवाले सभापतिका प्रत्याशी शेखर कोइरालालाई पराजित गरेका हुन् । 

उपसभापतिमा चाहिँ देउवा प्यानलबाट विजयकुमार गच्छदार र पूर्णबहादुर खड्का उम्मेदवार छन् । त्यस्तै, कोइराला प्यानलबाट चन्द्र भण्डारी र धनराज गुरुङ उम्मेदवार रहेका छन् । सभापतिका अर्का आकांक्षी प्रकाशमान सिंह प्यानलबाट सुजाता कोइरालाले उपसभापतिमा उम्मेदवारी दिएकी छिन् । 

अनि महेश आचार्यले पनि उपसभापतिमा उम्मेदवार दिएका छन् । उनले कुनै पनि प्यानलमा नरही स्वतन्त्र रुपमा उम्मेदवारी दिएका हुन् । 

यीमध्ये सभापति निर्वाचनको पहिलो चरणमा २ हजार मत कटाएकाले देउवा प्यानलका दुई जनालाई बलियो देखिएको छ । सँगसँगै कोइराला प्यानलका दुई उम्मेदवार गुरुङ र भण्डारीमध्ये एकले जित्न सक्ने अनुमान पनि गरिएका छन् ।