नेकपा एमालेका सचिव लेखराज भट्टले सभामुख पार्टीको विशेष दूत भएर काम गरिरहेको आरोप लगाएका छन् । बुधबार धनगढी विमानस्थलमा पत्रकारसँग कुरा गर्दै उनले भने,  ‘सभामुख सभामुख भएका छैनन्, उनी पार्टीको विशेष दूत भएर काम गर्छन्, सदन कसरी चलाउनुपर्छ भन्ने उनलाई ज्ञान नै छैन । सदनलाई कसरी अगाडि बढाउने, संसदीय मर्यादा कसरी राख्नुपर्छ भन्ने थाहा छैन ।’

भट्टले परमादेशबाट आएको सरकारले अहिलेको गतिरोध रोक्न नसक्ने बताए । ‘परमादेशबाट आएको सरकारले जे गर्नुपर्थ्यो, त्यही गरिरहेको छ,’ उनले भने । उनले अहिलेको सरकारबाट नागरिकलाई धेरै अपेक्षा नरहेको समेत दाबी गरे । 

एमसिसीको बारेमा एमाले पार्टीभित्र कुनै द्विविधा नरहेको प्रस्ट पार्दै भट्टले भने,  ‘पहिले त सरकारले सदनमा यो विषय ल्याउनुपर्यो, अनि के गर्ने भन्ने हुन्छ,’ भट्टले भने,’ गठबन्धनवाला सरकारले हामीसँग बहुमत छ भन्दै छ, टेबुल गरे हुन्छ त । हाम्रो त सहयोग चाहिन्छ भनेकै छैन त ।’  

पहिलेको सरकारले नै ल्याएको एमएमसीलाई एमाले सरकारले ले अगाडि बढाएको उनको तर्क छ ।

पार्टीको महाधिवेशन सम्पन्न भएपछि भट्ट पहिलोपटक गृह प्रदेशमा आएका हुन् । उनी जिल्ला अधिवेशनमा भाग लिन आइपुगेका हुन् ।