नेपालमा थप एक जनामा पछिल्लो समय विश्वमा ठूलो त्रासका रुपमा लिइएको कोरोनाभाइरस (कोभिड १९) को ओमिक्रोन भेरियन्ट संक्रमित व्यक्ति भेटिएका छन् । 

बुधबार स्वास्थ्य मन्त्रालयले दिएको जानकारीअनुसार एक ५८ वर्षका पुरुषमा ओमिक्रोन भेरियन्ट संक्रमण पुष्टि भएको हो ।

यसअघि १९ मंसिरमा ओमिक्रोन भेरियन्ट संक्रमण भएका दुई जना नेपालमा भेटिएका थिए । मन्त्रालयले त्यति बेला दिएको जानकारीअनुसार उनीहरुको सम्पर्कमा रहेका केही दर्जन मानिसहरुको चेकअप पनि गरिएको थियो । तर, कसैमा पनि ओमिक्रोन मात्र होइन, कोरोना संक्रमण समेत देखिएको थिएन । 

अब बुधबार मन्त्रालयले दिएको जानकारीअनुसार यी ५८ वर्षका पुरुष अहिलेसम्म कुनै पनि अरु देशमा गएका छैनन्, जहाँ कोरोनाका ओमिक्रोन भेरियन्ट संक्रमण देखिएको छ । 

आखिर उनलाई कसरी सर्यो त ओमिक्रोन ?

मन्त्रालयका एक अधिकारीका अनुसार ओमिक्रोन संक्रमित यसअघि जो भेटिएका थिए, उनीहरुसँग यी तेस्रा संक्रमितको सम्बन्ध रहेको छ । तर, अप्रत्यक्ष ।

यसअघि संक्रमित जुन होटलमा भेटिएका थिए, त्यही होटलमा यी ५८ वर्षका पुरुष पनि बसेका थिए । त्यहाँबाट नै उनलाई ओमिक्रोन संक्रमण भएको हुनसक्ने अनुमान गरिएको छ ।

स्वास्थ्य मन्त्रालयका अनुसार अब यी ओमिक्रोन संक्रमण भएका तेस्रा व्यक्तिको परिवारका सदस्य तथा सम्पर्कमा रहेका अन्यको कन्ट्याक्ट ट्रेसिङ सुरु गरिइसकिएको छ ।