काठमाडौं– नेपाल कम्युनिस्ट पार्टीका अध्यक्ष पुष्पकमल दाहाल प्रचण्डले पार्टीको नियमित बैठक नबस्ने गुनासो लिएर भेट्न पुगेका नेताहरूसँग आफैंले गुनासो गरेका छन् । अध्यक्ष प्रचण्डले पार्टीको सचिवालय बैठक बस्न नसकेको भन्दै आफूलाई नै दिग्दार लागेको गुनासो गरेका छन् ।
केन्द्रीय समितिको माग गर्दै मंगलबार आठबुँदे ज्ञापनपत्र बुझाउन पुगेका केन्द्रीय सदस्यहरूसँग प्रचण्डले बैठक बस्न नसकेको भन्दै आफूलाई नै दिग्दार लागेको भन्दै नेताहरूसँग असन्तुष्टि पोखेका थिए ।
प्रचण्डलाई भेट्न पुगेका एक नेताले प्रचण्डलाई उद्धृत गर्दै भने, ‘तपाईंहरूका माग र गुनासा जायज छन् । अबको बैठकका एजेन्डा यिनै हुन् । प्रधानमन्त्रीको व्यस्तताले पनि होला, बैठक नै बस्न सकिरहेको छैन ।’
सोमबार केन्द्रीय सचिवालय बैठक बसेर केन्द्रीय सदस्यहरूको कार्यविभाजन तथा प्रदेश कमिटीहरूको टुंगो लगाउने भनिएको थियो । तर, बैठक बस्न नसकेपछि केन्द्रीय सदस्यहरु आठबुँदे मागसहित प्रचण्डलाई भेट्न पुगेका थिए ।
नेकपाको सचिवालय बैठक आज ४ बजेका लागि बोलाइएको थियो तर प्रधानमन्त्रीको व्यस्तताका कारण देखाउँदै आजको बैठक पनि स्थगित भएको जनाइएको छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।