प्रधानमन्त्री तथा नेपाली कांग्रेसका सभापति शेरबहादुर देउवाले मेलमिलापको नीतिकै जगमा लोकतन्त्र बहाली भएर राजनीतिक परिवर्तन सम्भव भएको बताएका छन् ।
राष्ट्रिय एकता तथा मेलमिलाप दिवसको अवसरमा आज शुभकामना दिँदै उनले बिपी कोइराला, गणेशमान सिंहलगायत नेताहरूको कारण राजनीतिक परिवर्तन सम्भव भएको बताएका हुन् ।
‘२०३३ पुस १६ गते आजकै दिन बिपी कोइराला, गणेशमान सिंह लगायतका हाम्रा श्रद्धेय नेताहरूले राष्ट्रिय एकता तथा मेलमिलापको नीति लिई निर्वासित जीवन त्याग गरी स्वदेश फर्किनुभएको थियो, उहाँहरूको राष्ट्रिय एकता तथा मेलमिलापको नीतिकै जगमा लोकतन्त्र बहाली हुँदै अहिलेको राजनीतिक परिवर्तन सम्भव भएको हो । आजको दिन हाम्रा नेताहरूको त्याग, संघर्ष र योगदानको उच्च सम्मान प्रकट गर्दछु,’ देउवाले सामाजिक सञ्जालमार्फत भनेका छन् ।
प्रथम जननिर्वाचित प्रधानमन्त्री बिपी आफूमाथि आठवटा मृत्युदण्डका मुद्दा अदालतमा चलिरहेका बेला राष्ट्रिय एकता तथा मेलमिलापको नीति लिएर स्वदेश फर्केको सम्झनामा आज मेलमिलाप दिवस मनाइँदैछ ।
१६ पुस २०३३ मा कांग्रेसका संस्थापक नेतासमेत रहेका कोइरालाको नेतृत्वमा सर्वोच्च नेता गणेशमान सिंह, नेत्री शैलजा आचार्य, नेता खुमबहादुर खड्का, रामबाबु प्रसाईं, नीलाम्बर पन्थीलगायत नेता/कार्यकर्ता राष्ट्रिय एकता तथा मेलमिलापको नीति लिएर करिब आठ वर्ष लामो निर्वासित जीवन त्याग गरी स्वदेश फर्केका थिए ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।