भारतको राजस्थानस्थित हनुमानगढ जिल्लामा किसानले पालेका गधा चोरीका घटना दोहोरिन थालेका छन् । चोरीका घटना बढेपछि त्यहाँ प्रहरी हैरान भएका छन् । 

बिबिसीका अनुसार गधा चोर पत्ता लगाउन प्रहरीले छुट्टै टोली बनाएको छ । साथै, मानिसहरूलाई आफ्ना गधा घरभित्रै राख्न सुझावसमेत दिइएको छ ।

हनुमानगढको खुईयाँ थाना क्षेत्रका कैयौँ गाउँमा १० डिसेम्बरयता गधा चोरी भएको भन्दै प्रहरीमा लगातार उजुरी पर्न थालेको हो । उजुरी दिएको लामो समयसम्म पनि प्रहरीले चासो नदिएपछि गोठालाहरूले प्रहरी चौकीअगाडि धर्नासमेत सुरु गरेका छन् ।

हनुमानगढ जिल्लामा कृषिपछि सबैभन्दा धेरै गरिने व्यवसाय भनेको पशुपालन हो । यहाँका गोठालाले भेडा, बाख्राबाख्री र गाईसँगै एउटादेखि दुईवटा गधा पनि राख्ने गर्छन् ।