प्रधानमन्त्री शेरबहादुर देउवाको आइतबारबाट सुरु हुने तीन दिने भारत भ्रमण स्थगित भएको छ ।
कोरोना संक्रमण बढेपछि गुजरात सरकारले आज भाइब्रेन्ट गुजरात ग्लोबल समिट स्थगित गर्ने निर्णय गरेसँगै देउवाको भारत भ्रमण स्थगित भएको हो । देउवा उक्त समिटम सहभागी हुन आइतबार भारत जाँदै थिए ।
भारतको विदेश मन्त्रालयले आज नै देउवाको भ्रमण स्थगित भएको जानकारी नयाँदिल्लीस्थित नेपाली दूतावासलाई समेत दिइसकेको छ ।
‘आज संयुक्त रूपमा भ्रमणको औपचारिक घोषणा गर्ने भन्ने थियो । तर अचानक भ्रमण स्थगित गर्नुपरेको जानकारी भारतको विदेश मन्त्रालयले दिएको छ,’ नयाँदिल्लीस्थित नेपाली दूतावास स्रोतले फरकधारसँग भन्यो ।
परराष्ट्र मन्त्रालयले देउवाको भारत भ्रमणको सम्पूर्ण तयारी गरिसकेको थियो । उनको भ्रमणमा दलमा ३० जना रहने र भारत भ्रमणका बेला केही सम्झौतामा हस्ताक्षर समेत गर्ने तयारी भएको थियो ।
प्रधानमन्त्री देउवाले भाइब्रेन्ट गुजरात ग्लोबल समिटलाई सम्बोधन गर्ने र त्यर्ही भारतका प्रधानमन्त्री नरेन्द्र मोदीसँग द्विपक्षीय वार्ता गर्ने तयारी गरिएको थियो ।
यही जनवरी १० बाट भारतको गुजरातमा सुरु हुने भाइब्रेन्ट गुजरात ग्लोबल समिटको १०औं संस्करणको उद्घाटन भारतीय प्रधानमन्त्री मोदीले गर्ने घोषणा यसअघि नै गरिएको थियो । गुजरात मोदीको गृह राज्य हो ।
भारतमा कोरोना भाइरसको संक्रमण पछिल्ला दिन ह्वात्तै बढेपछि गुजरात सरकारले भाइब्रेन्ट गुजरात ग्लोबल समिट स्थगित गर्ने निर्णय आज गरेको हो । समिट जनवरी १० देखि १२ सम्म तीन दिन चल्ने तय गरिएको थियो ।
गुजरातका मुख्यमन्त्री भुपेन्द्र पटेलले कोरोना संक्रमणको अवस्था बुझेपछि समिट स्थगित गरिएको थियो । बुधबार गुजरातामा ३ हजार ३५० जना कोरोना भाइरसका नयाँ संक्रमित थपिएका थिए । जनवरी १ मा गुजरातमा मात्र १ हजार ५९ जना संक्रमित थपिएका थिए । अहिले गुजरातमा सक्रिय कोरोना संक्रमितको संख्या १० हजार ९९४ रहेको छ ।
समिट आयोजना गर्दा कोरोना संक्रमण फैलने भन्दै मुख्यमन्त्री पटेलले स्थगित गर्ने निर्णय गरेका हुन् । समिटमा २६ देशबाट पाहुना बोलाइएको थियो ।
अब प्रधानमन्त्री देउवाको भारत भ्रमण पुनः कूटनीतिक च्यानल मार्फत तय गरिने भारतीय विदेश मन्त्रालयले जानकारी दिएको छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।