सत्तारुढ नेपाली कांग्रेसका महामन्त्री गगनकुमार थापाले देशलाई सम्हाल्न सकारात्मक सोच भएका तन्नेरीहरु चाहिएको बताएका छन् । देशमा धेरै कुरा बिग्रेको उल्लेख गर्दै महामन्त्री थापाले त्यसलाई सम्हालेर अघि बढ्न सकारात्मक सोच भएका तन्नेरी चाहिएको बताएका हुन् । 

शनिबार काठमाडौंमा आयोजित एक कार्यक्रममा बोल्दै नेता थापाले तन्नेरीहरु जोशिला हुने र त्यसमा थप सकारात्मक चिन्तन आवश्यक रहेको बताए । नेपाललाई योभन्दा धेरैमाथि पुर्याउने संकल्पसहित आफूले अबको १०–१५ वर्ष मात्रै सक्रिय राजनीति गर्न चाहेको पनि महामन्त्री थापाले दोहोर्याए ।

बिग्रेको देश सम्हाल्ने गरी पठनपाठनको विषयलाई अघि बढाउनुपर्नेमा उनको जोड थियो । महामन्त्री थापाले देशलाई समस्या खडा गर्नेहरुको आवश्यकता नभएको स्पष्ट पारे ।