नेपाली कांग्रेसका महामन्त्री विश्वप्रकाश शर्माले कोरोनाको संक्रमण पुष्टिपछि आइसोलेसनमा नबस्नुलाई ‘बहादुरी’ मान्न नसकिने बताएका छन् । संक्रमित भएर पनि आइसोलेसनमा नबस्नुलाई उनले गैर-जिम्मेवारीको पराकाष्ठा, कानुनको उल्लङ्घन र अन्य नागरिकको जीवनप्रति गम्भीर खेलबाडसमेत भएको बताए । 

संक्रमितहरू आइसोलेसनमा नबसी खुलमखुला हिँडेर संक्रमण फैलाएको चर्चा चलिरहेको बेला महामन्त्री शर्माको आक्रोशपूर्ण अभिव्यक्ति हो । उनी केही दिनअघि संक्रमित भएका थिए । संक्रमित भएपछि आइसोलेसनमा बसेर उनी स्वस्थ भइसकेका छन् । 

उनले भनेका छन्, ‘संक्रमण पुष्टिपछि आइसोलेसनमा बस्नु हामी हरेकको जिम्मेवारी हो । पालना नगर्नु बहादुरी होइन, गैह्र जिम्मेवारीको पराकाष्ठा, कानुनको उल्लंघन र अन्य नागरिकको जीवनप्रति गम्भीर खेलबाड समेत हो । यही ज्ञान र विज्ञान आत्मसात गरेर संक्रमणपछि पूर्ण आइसोलेसनमा बसेर बल्ल सांगठनिक काममा फर्केको छु ।’