कर्णाली प्रदेशका उद्योग, पर्यटन वन तथा वातावरणमन्त्री छिरिङ डम्डोल लामा (कार्चेन)लाई हटाउन माग गर्दै उच्च अदालतमा रिट परेको छ । 

लामा फौजदारी अभियोगमा दोषी ठहरिएकाले उनलाई मन्त्री बनाएको भन्दै सो निर्णय खारेज गर्न माग गर्दै मध्यपश्चिम विश्वविद्यालय कानुन संकायकी विद्यार्थी बिनिता बोगटीले रिट दायर गरेकी हुन् । 

लामा नेकपा माओवादी केन्द्रको सिफारिसमा कर्णाली प्रदेश सरकारको मन्त्री बनेका हुन् । हुम्ला ताक्लाकोटको खोच्यारनाथ गुम्बाबाट मूर्ति चोरेको आरोपमा लामालाई अदालतले ०५१ मंसिर २५ गते दुई वर्ष कैद र पाँच हजार जरिवानाको फैसला सुनाएको थियो ।

सोमबार दायर भएको रिटमा प्रदेश प्रमुखको कार्यालय, कर्णाली सरकार र मन्त्री लामालाई विपक्षी बनाइएको छ । रिटमा बोगटीले लामालाई मन्त्री बनाउनु संविधान विपरीत भएको भन्दै तत्काल हटाउन माग गरेकी छन् । 

उनले मन्त्रिपरिषदलाई समावेशी बनाउन पनि माग गरेकी छिन् ।