स्वास्थ्य तथा जनसंख्या मन्त्रालयले जोन्सन एण्ड जोन्सन खोप लगाएकाहरुले बुस्टर डोजका रुपमा कोभिसिल्ड, अस्ट्राजेनेका, मोर्डना वा फाइजर खोप लगाउन मिल्ने जनाएको छ । 

जोन्सन एण्ड जोन्सन खोप लगाएको व्यक्तिहरूले ६ महिनापछि उपलब्ध भएसम्म सोही खोप, उपलब्ध नभएको खण्डमा कोभिसिल्ड, अस्ट्राजेनेका, मोडर्ना वा फाइजर खोप लगाउन मिल्ने मन्त्रालयले जनाएको हो।

स्वास्थ्य सेवा विभागअन्तर्गत परिवार कल्याण महाशाखाले बुधबार जारी गरेको परिपत्रमा भनिएको छ, ‘प्रस्तुत विषयमा यस महाशाखाको प.सं. २०७८-७९ च.नं. ९७० मिति २०७८-१०-२७ गतेको पत्रअनुसार कोभिड-१९ विरुद्धको खोपको बुस्टर मात्राको हकमा १८ वर्ष पुरा गरेका सम्पूर्ण व्यक्तिहरूलाई पुरा मात्रा (पहिलो शृङखला) लगाएको ६ महिना पछि उपलब्धताको आधारमा कोभिसिल्ड, अस्ट्राजेनेका, मोडर्ना वा फाइजर खोप प्रदान गर्ने भनी परिपत्र भइसकेको अवस्थामा विभिन्न जिल्लाबाट ज्यान्सेन (जे एण्ड जे) खोप लगाएकाहरूलाई के गर्ने भनी जिज्ञासा आइरहेको सन्दर्भमा जोन्सन (जे एण्ड जे) खोप लगाएका व्यक्तिहरूलाई पनि ६ महिना पछि उपलब्ध भएमा सोही खोप, तर नभएमा कोभिसिल्ड, अस्ट्राजेनेका, मोडर्ना वा फाइजर खोप लगाउन मिल्ने ब्यहोरा जानकारीको लागि अनुरोध छ।’