काठमाडाैं–गत साउन १० गते बलात्कारपछि हत्या गरिएकी बालिका निर्मला पन्तको आज बुधबार जन्मदिन हो । २०६१ मंसिर २६ गते जन्मिएकी निर्मलाको बलात्कार गरी हत्या गर्ने अपराधी अहिलेसम्म पत्ता लाग्न सकेको छैन । अपराधी पत्ता लागाउनुपर्ने मागसहित कञ्चनपुर जिल्ला प्रशासन कार्यालयअगाडि धर्ना बसेकै समयमा निर्मलाका बुबा यज्ञराज पन्तको स्वास्थ्य अवस्था बिग्रिएको थियो ।
धर्नाका क्रममा बिरामी भएपछि उपचारका लागि काठमाडौं शिक्षण अस्पतालमा ल्याइएका निर्मलाका बुबा यज्ञराज पन्तले फरकधारसँगको कुराकानीमा निराशा पोखेका छन् ।
उनले सरकारले अब न्याय दिनेमा आश मरिसकेको बताए । अहिले स्वास्थ्य अवस्थामा सुधार हुँदै गएपछि सामान्य अवस्थामा फर्किएका पन्तले निराश हुँदै भने, ‘अब न्याय पाइएलाजस्तो छैन ।’
निर्मलाको बलात्कारपछि हत्या भएको १ सय ४० दिन पुगेको छ ।
कञ्चनपुर जिल्ला प्रशासन कार्यालयअगाडि निर्मलाकी आमा र अधिकारकर्मीले न्यायका लागि धर्ना सुरु गरेको आज १ महिना पूरा भएको छ । ‘एक महिनादेखि नसुतेरै न्यायका लागि धर्नामा छन्, तैपनि सरकार केही भन्दैन,’ यज्ञराजले सुनाए, ‘न्यायकै लागि गरिबको परिवार डुब्न थालिसक्यो ।’
९ मंसिरमा काठमाडौं आएका पन्त अहिले शिक्षण अस्पतालमा उपचाररत छन् । उनको स्वास्थ्य अवस्थामा अहिले केही सुधार देखिएको छ । शिक्षण अस्पतालले उनलाई आगामी सोमबार या मंगलबारसम्म डिस्चार्ज गर्न सकिने बताएको पन्तले सुनाए ।
गत भदौमा छोरीका लागि न्याय माग्दै काठमाडौं आएका पन्तले ‘कि गोली ठोक, कि न्याय देऊ’ भन्दै सरकारलाई गरेको प्रश्न फेरि दोहोर्याए । उनले न्यायको यो लडाइँमा आफू कहिल्यै नथाक्ने सुनाए ।
शिक्षण अस्पतालबाट डिस्चार्ज भएर गृहजिल्ला कञ्चनपुर गएर फेरि धर्ना बस्ने योजना बनाएको पन्तले फरकधारलाई सुनाए । ‘महेन्द्रनगर गएर फेरि धर्नामा बस्छु,’ उनले भने । निराशाबीच पनि दृढ स्वरमा उनले भने, ‘बरु म मर्न तयार हुन्छु, न्याय माग्न छाड्दिनँ ।’
१८ दिनदेखि शिक्षण अस्पतालमा उपचाररत पन्तको उपचार खर्च गृह मन्त्रालयले बेहोर्ने भएको छ । उनको १८ दिनसम्मको उपचार खर्च करिब डेढ लाख रुपैयाँ भएको छ ।
सरकारको बुद्धि फिरोस् भन्दै सडकमै ‘हवन’
यता निर्मला पन्तको जन्मदिनको अवसर पारेर कञ्चनपुरका अधिकारकर्मीले ‘सरकारको सद्बुद्धिका’ लागि भन्दै हवन गरेका छन् । कञ्चनपुर जिल्ला प्रशासन कार्यालयअगाडिको सडकमा अधिकारकर्मी र स्थानीयवासी मिलेर हवन गरेका हुन् ।
सरकारको बुद्धि फिरोस्, वास्तविक अपराधी सार्वजनिक गरियोस्, निर्मलाको आत्माले शान्ति पाओस् भन्दै सडकमै हवन गरिएको कञ्चनपुरकी अधिकारकर्मी शारदा चन्दले जानकारी दिइन् ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।